اسلام آباد (این این آئی)کسٹمز انٹیلی جنس کراچی نے برآمدات میں جعلسازی میں ملوث 7 کمپنیوں کے خلاف مقدمات درج کر لیے ہیں۔کسٹمز انٹیلی جنس کراچی نے رعایتی قیمت پر درآمدی مال منگوا کر برآمدات کرنے میں ناکام رہنے والی 7 کمپنیوں کے خلاف مقدمے درج کیے ہیں۔درج مقدمات میں کمپنیوں پر الزام ہے کہ 303 ملین کی درآمدات کی گئیں

جس پر 156 روپے کی ٹیکس چھوٹ حاصل کی گئی، تاہم چھوٹ ملنے کے باوجود کچھ بھی ایکسپورٹ نہ کیا گیا۔مقدمے کے مطابق ایس آر او کے تحت کمپنیاں درآمدی مال پر ٹیکس چھوٹ کے بعد برآمدات کی پابند تھیں۔ڈائریکٹر جنرل (ڈی جی)کسٹمز انٹیلی جنس کراچی نے کہا کہ برآمدات میں جعلسازی سے ملک کو اربوں روپے کا نقصان ہو رہا ہے، ملکی خزانے کو نقصان پہنچانے والے عناصر کے خلاف کارروائی ہو گی۔