پاکستانی سیاستدان عوام کی غربت کا ایسے ذکر کرتے ہیں جیسے وہ خود کسی جھونپڑی میں مقیم ہیں اور غریبوں کے مسائل بہت بہتر انداز میں سمجھتے ہیں مگر جب ان پرتعیش رہائش گاہوں کو دیکھا جائے تو سب کچھ جھوٹ معلوم ہوتا ہے۔ ان کے عوامی خدمت کے دعوے بے بنیاد معلوم ہوتے ہیں۔ سابق صدر و شریک چیئرمین پیپلزپارٹی آصف زرداری کی برطانیہ میں راک وڈ سٹیٹ 15 بیڈ رومز سمیت 30 کمروں پر مشتمل ہے۔ گھر کا فرنیچر مہنگا اور بیرونی مناظر دلکش ہیں۔ منہاٹن میں بلیئر اپارٹمنٹس کا ایک فلیٹ بھی آصف زرداری کی ملکیت ہی ہے۔ پیپلزپارٹی کی رہنما شیری رحمٰن کا گھر بھی بہت رنگین ہے جس میں ایک بہت بڑی لائبریری بھی واقع ہے۔ بینظیر بھٹو کی ملکیت دبئی میں پرتعش محل بھی دیکھنے کے قابل ہے۔ محل کے اندرونی مناظر ایسے ہیں کہ شاید کوئی غریب ان کا تصور بھی نہ کر سکے۔ وزیراعظم کا رائیونڈ محل بھی بہت خوبصورت اور وسیع و عریض ہے جہاں مختلف جگہوں پر شیر کے مجسمے بھی نصب ہیں۔ سابق صدر پرویز مشرف کا چک شہزاد میں فارم ہاﺅس بھی کیا خوب چیز ہے جبکہ اسلام آباد میں بھی ان کی ملکیت ایک بنگلہ موجود ہے۔ متحدہ قومی موومنٹ کے سربراہ الطاف حسین بھی برطانیہ میں ایک خوبصورت بنگلے کے مالک ہیں جبکہ چیئرمین تحریک انصاف عمران خان کا بنی گالا میں دو سو کنال پر محیط فارم ہاﺅس ہے۔ قائداعظم محمد علی جناح کی زیارت ریزیڈنسی بھی خوبصورت ہے جبکہ پاکستان کے پہلے وزیراعظم لیاقت علی خان کا ایک بنگلہ مظفرنگر بھارت میں دریافت ہوا ہے۔ پاکستان عوامی تحریک کے سربراہ طاہرالقادری کا کنٹینر بھی کیا خوبصورت تھا۔ –