اسلام آباد(این این آئی)عالمی مالیاتی فنڈ(آئی ایم ایف)کے ایگزیکٹو بورڈ نے اسٹینڈ بائی ارینجمنٹ (ایس بی اے)کے تحت پاکستان کیلئے ایک ارب 10کروڑ ڈالر کی آخری قسط جاری کرنے کی منظوری دے دی۔تفصیلات کے مطابق پیرکو واشنگٹن میں پاکستان سے متعلق آئی ایم ایف ایگزیکٹو بورڈ کا اجلاس ہوا جس میں پاکستان کو ایک ارب 10کروڑ ڈالر فوری جاری کرنے کی منظوری دی گئی۔
ذرائع کے مطابق آئی ایم ایف نے آخری قسط کی منظوری اسٹینڈ بائی اریجمنٹ کے تحت دی، ایگزیکٹو بورڈ کی منظوری سے جلد رقم پاکستان کو جاری کردی جائے گی۔اسٹینڈ بائی ارینجمنٹ معاہدے کے تحت پاکستان کو 3ارب ڈالر ملنے تھے تاہم پاکستان کو 1.9ارب ڈالر آئی ایم ایف سے پہلے مل چکے ہیں۔اجلاس میں آئی ایم ایف کے ایگزیکٹو بورڈ کی جانب سے پاکستانی معیشت میں بہتری کا اعتراف بھی کیا گیا۔آئی ایم ایف کی رقم منتقل ہوتے ہی 9ماہ پر محیط اسٹینڈ بائی اریجمنٹ مکمل ہو جائے گا۔اسٹینڈ بائی ارینجمنٹ کی وجہ سے ہی پاکستان ڈیفالٹ سے بچنے میں کامیاب ہوا،یہ پاکستانی معیشت کے لئے اچھی خبر ہے اور ریٹنگ میں بہتری کا بھی امکان ہے۔حکومت پاکستان اب آئندہ 3سال کیلئے نئے پروگرام کے لئے آئی ایم ایف سے مذاکرات کی کوشش کر رہی ہے جبکہ آئی ایم وفد اب پاکستان کا دورہ بھی کرے گا۔