اسلام آباد (نیوزڈیسک) کابینہ کمیٹی برائے نجکاری کا اجلاس وفاقی وزیر خزانہ اسحاق ڈار کی زیر صدارت ہوا، اجلاس میں فیصلہ ہوا کہ وفاقی حکومت کی جانب سے اسٹیل ملز سندھ حکومت کو فروخت کرنے کی پیشکش کی جائیگی، کمیٹی نے سندھ حکومت کی خواہش پر اسٹیل مل سندھ کو دینے کی تجویز کی منظوری دے دی۔ کابینہ کمیٹی کے مطابق سندھ حکومت کو اسٹیل ملز اثاثوں، قرضوں اور بقایاجات سمیت فروخت کی پیشکش کی جائیگی۔ کابینہ کمیٹی نے فیصل آباد الیکٹرک کمپنی کی نجکاری کے ڈھانچے کی بھی منظوری دیدی۔ فیسکو کے 74 فی صد حصص فروخت کیلئے پیش کئے جائیں گے۔ اجلاس میں وفاقی وزیر اطلاعات پرویز رشید، وزیر پیٹرولیم شاہد خاقان عباسی، اقتصادی امور کے مشیر بیرسٹر ظفر اللہ اور ڈاکٹر مفتاح اسماعیل نے شرکت کی۔