تل ابیب (این این آئی)اسرائیلی حملوں میں شہید فلسطینیوں کی تعداد 7028 ہو گئی جبکہ 18 ہزار 500 فلسطینی زخمی ہیں۔شہدا میں 3000 سے زائد بچے اور 1700سے زائد خواتین شامل ہیں۔غیرملکی خبررساں ادارے کے مطابق 2ہزار کے قریب فلسطینی لاپتہ ہیں جن کے تباہ شدہ عمارتوں کے ملبے میں دبے ہونے کا خدشہ ہے۔

علاوہ ازیں غزہ کی پٹی میں رات کو بھی اسرائیلی فوج نے بمباری کی اور مزید21 فلسطینیوں کو شہید کر دیا۔فلسطینی میڈیا کے مطابق غزہ شہر کے الزیتون محلے میں النادیم خاندان کے 4 منزلہ مکان پر بم باری کی گئی جس سے 10 فلسطینی شہید اور متعدد زخمی ہو گئے۔جنوبی غزہ کی پٹی کے خان یونس مہاجر کیمپ میں ساطری خاندان کے گھر پر بم باری سے 3 فلسطینی شہید اور کئی زخمی ہو گئے۔وسطی غزہ کی پٹی کے نوصیرات کیمپ میں الحر خاندان کے گھر پر بھی بم باری کی گئی جس میں8 افراد شہید ہوئے۔