سابق کرکٹر شاہد آفریدی نے بیٹی انشا آفریدی کی رخصتی پر جذباتی پیغام شیئر کردیا۔شاہد آفریدی نے اپنے سوشل میڈیا اکائونٹس پر بیٹی انشا آفریدی کی رخصتی کی تقریب کی تصاویر شیئر کردیں۔پشت سے لی گئی تصاویر میں شاہد آفریدی کو بیٹی انشا آفریدی اور داماد فاسٹ بولر شاہین شاہ آفریدی کے ساتھ دیکھا جا سکتا ہے۔ بیٹی کی رخصتی پر شاہد آفریدی نے اپنے جذبات کا اظہار اشعار کی صورت میں کیا۔
بیٹی پر اشعار
شاہد آفریدی نے جو شعر شیئر کیے وہ یہ تھے۔
”آیا تھا گھر میں نور ابھی کل کی بات ہے،
رخصت بھی ہورہا ہے وہ آنکھوں کے سامنے،
ڈوبا ہوا بھی ہے ترے بابا کا دل،
مگر امید صبح نو اسے آئی ہے تھامنے”
شاہد آفریدی کی جذباتی پوسٹ سوشل میڈیا پر وائرل ہوگئی اور لوگوں نے اسے بیٹی کے لیے ایک باپ کے حقیقی احساسات قرار دیا۔
انشا آفریدی کی شادی
انشا آفریدی کی شادی گزشتہ شب قومی کرکٹ ٹیم کے بولر شاہین شاہ آفریدی سے کراچی میں ہوئی۔قبل ازیںسفید کپڑوں کے ساتھ کریم رنگ کی شیروانی میں ملبوس دلہا شاہین آفریدی اپنے قریبی عزیز و اقارب اور رشتے داروں کے ہمراہ بارات لیکر پہنچے تو شاہد خان آفریدی نے ان کا استقبال کیا۔تقریب میں پاکستان کرکٹ ٹیم کے کپتان بابر اعظم، سابق ٹیسٹ کپتان مصباح الحق، سعید انور سمیت دیگر کرکٹرز نے شرکت کی۔شوبز کی معروف شخصیات، سیاستدان، غیر ملکی سفارت کار، اعلی عسکری و سول حکام اور مختلف شعبہ ہائے زندگی سے تعلق رکھنے والے افراد بھی شریک تھے۔
ٹیسٹ کپتان بابر اعظم نے گرم جوشی کے ساتھ شاہین شاہ آفریدی اور شاہد آفریدی کو گلے لگا کر شادی کی مبارک باد پیش کی.مشروبات کے بعد شرکا تقریب کی تواضع مختلف اقسام کے کھانوں سے کی گئی۔تقریب ولیمہ بدھ کو اسلام آباد میں طے ہے، قبل ازیں پیرکی شب رسم حنا میں قریبی عزیزو اقارب نے شرکت کی تھی۔واضح رہے کہ شاہین آفریدی اور انشا افریدی کا نکاح 23 فروری کوہوا تھا، ولیمہ جمعرات کو اسلام آباد میں ہوگا۔
