کولمبو (این این آئی)قومی کرکٹ ٹیم کے فاسٹ بولر زمان خان نے کہا ہے کہ کبھی زندگی میں نہیں سوچا تھا کہ بڑے لیول پر آ کر ایشیا کپ کھیلوں گا۔پاکستان کرکٹ بورڈ (پی سی بی)ڈیجیٹل سے بات چیت میں ڈیبیو سے قبل اپنے تاثرات کا اظہار کرتے ہوئے زمان خان نے کہا کہ بہت اچھا محسوس کر رہا ہوں۔انہوں نے کہا کہ کبھی زندگی میں نہیں سوچا تھا کہ بڑے لیول پر آ کر ایشیا کپ کھیلوں گا، بے یانتہا خوشی تھی جب میرا نام آیا۔

زمان خان نے کہا کہ ایشیا کپ میں پاکستان کی طرف سے کھیلنا میرے لیے اعزاز کی بات ہے۔ون ڈے میں ڈیبیو سے متعلق بات کرتے ہوئے زمان خان نے کہا کہ ٹی ٹوئنٹی میں ڈیبیو کرچکا ہوں۔ کافی عرصے کے بعد اپنے ساتھی کھلاڑیوں سے ملا ہوں کافی خوشی ہوئی۔انہوں نے کہا کہ حارث رئوف اور شاہین آفریدی کے ساتھ کافی کرکٹ کھیل چکا ہوں،ان سے سری لنکا کی کنڈیشنز اور وکٹوں پر بولنگ کا پوچھا کہ کیسے کرنی ہے۔ انہوں نے بتایا بھی ہے لہذا امید کرتا ہوں اچھا ہی ہوگا۔