اسلام آباد (این این آئی)الیکشن کمیشن نے عام انتخابات 2023 میں انتخابی نشانات الاٹ کرنے کے لیے درخواستیں طلب کرلی ہیں۔الیکشن کمیشن کی جانب سے بیان میں بتایا گیا کہ سیاسی جماعتیں مختص شدہ انتخابی نشان کے لیے درخواستیں جمع کروائیں

درخواستیں پارٹی سربراہ کے دستخط کے ساتھ 19 جولائی تک دی جاسکتی ہیں۔الیکشن کمیشن نے کہا کہ درخواست کے ساتھ انتخابی نشانات کی ترجیحی لسٹ منسلک کی جائے، ہر درخواست پر پارٹی سربراہ کے دستخط ہونا ضروری ہیں، ہر درخواست پر سیاسی جماعت کے ہیڈ آفس کا پتہ ہونا بھی ضروری ہے، درخواست موصول ہونے پر تمام سیاسی جماعتوں کی اہلیت پرکھی جائیگی۔الیکشن کمیشن کے مطابق فروری مارچ کے پنجاب،کے پی انتخابات کے لیے درخواست دینیوالی پارٹیاں دوبارہ درخواست دیں، نامکمل اور فیکس کے ذریعے موصول درخواست پر غور نہیں کیا جائیگا، آج سے قبل انتخابی نشان کے حصول کی درخواستوں پربھی غور نہیں کیا جائیگا۔الیکشن کمیشن نے کہا کہ انتخابی نشانات کیلئے 19 جولائی2023 کہ بعد ملنے والی درخواستوں پر غور نہیں کیا جائیگا، درخواستوں کیساتھ الیکشن ایکٹ2017 کے سیکشن 206 کے منسلکہ حلف نامہ لازمی ہے۔