لاہور( این این آئی)ملک بھرکے درباروں کے گدی نشینوں اور سجادہ نشینوں نے جناح ہائوس کا دورہ کیا ،وفد کی قیادت سجادہ نشین آستانہ عالیہ کوٹ مٹھن شریف خواجہ معین الدین محبوب کوریجہ نے کی،وفد میں پیرسید حسنین محبوب، خواجہ اسرارالحق نظامی، پیر سید علی رضا گیلانی اور دیگر شامل تھے۔وفد نے 9 مئی کے واقعات اور جناح ہائوس کے جلائو گھیرائوپرشدید دکھ کا اظہارکیا۔اس موقع پرخواجہ معین الدین محبوب کوریجہ نے کہا کہ 9 مئی کا دن پاکستان کی تاریخ کا بدترین دن ہے،اس دن کو ہمیشہ یوم سیاہ کے طورپر یاد رکھا جائے گا۔وفد نے 9مئی سانحہ کے ماسٹر مائنڈ، منصوبہ سازوں اور سہولت کاروں کوعبرتناک سزا دینے کا مطالبہ کیا ۔ چیئرمین کل مسالک علما ء بورڈ مولانا محمدعاصم مخدوم سمیت30 سے زائد مشائخ وفد میں شامل تھے۔