اسلام آباد (این این آئی) پاکستان تحریک انصاف کے سیکرٹری جنرل عمر ایوب نے دعویٰ کیا ہے کہ پولیس نے رات 3 بجے شاندانہ گلزار کی والدہ کے گھر چھاپہ مارااور ان کا موبائل فون چھین لیا۔ اپنے بیان میں عمر ایوب نے کہاکہ اس اقدام کی سخت ترین الفاظ میں مذمت کرتے ہیں۔ انہوں نے کہاکہ بزرگ خواتین کو ہراساں کیا جا رہا ہے،یہ امپورٹڈ فاشسٹ حکومت اور کتنی پستی کا شکار ہو گئی۔
انہوں نے کہاکہ لوگوں کو ظلم کے خلاف بولنے سے روکنے کے لیے دہشت زدہ کرنا کب تک جاری رہے گا۔عمر ایوب نے کہاکہ اس فاشسٹ حکومت کو حقیقت کا سامنا کرنا چاہیے، حکومت کو جان لینا چاہیے کہ اس نے عوام کو مایوسی کے سوا کچھ نہیں دیا،یہ لوگ عوام کو حقیر سمجھتے ہیں۔ انہوں نے کہاکہ جب ایک ظالم حکومت مخالف آوازوں کو کچلتی ہے تو اس کے دن صحیح معنوں میں گنے جاتے ہیں اور یہ صرف خوف سے حکومت کرتی ہے۔
ایک اوربیان میں عمر ایوب نے کہاکہ کیا ستم ظریفی ہے ایک غیر قانونی وزیراعلیٰ پنجاب ایک امپورٹڈ وزیر اعظم کے ساتھ آئندہ پنجاب کے بجٹ پر بحث کر رہا ہے،یہ لوگ جانتے ہیں کہ پیش کیا جانے والا بجٹ غیر قانونی ہوگا اور اسے چیلنج کیا جائے گا۔ انہوں نے کہاکہ خرچ کیے گئے اخراجات غیر قانونی ہوں گے،چیف سیکرٹری اور بیوروکریسی آنے والے دنوں میں خود کو قانونی چارہ جوئی کے لیے پیش کریں گے۔ انہوں نے کہاکہ پنجاب کا بجٹ غلط مفروضوں پر مبنی ہو گا، جس طرح وفاقی بجٹ پیش کیا گیا تھا جو کہ جعلی اعداد و شمار پر مبنی تھا۔ سابق وزیر نے کہاکہ فاقی بجٹ حقیقی اخراجات کو پورا کرنے کے لیے خیالی رقم کی آمد پر مبنی تھا، یہ ہولناک تباہی کا ایک نسخہ ہے جو پاکستانی عوام کے لیے گہرے درد کا باعث بنے گا۔
