مدینہ منورہ(این این آئی )مسجد الحرام میں نماز جمعہ کی ادائیگی کے لئے پاکستان حج مشن نے خصوصی انتظامات کرتے ہوئے عازمین کی رہنمائی کے لئے 50 سے زائد حرم گائیڈز تعینات کیے ہیں۔

میڈیارپورٹس کے مطابق وزارت مذہبی امور کے حکام نے بتایاکہ حرم گائیڈز حرم کے 7 دروازوں اور کلاک ٹاور کے سامنے پاکستانی پرچم والی جیکٹ اور ٹوپی پہنے ہر وقت موجود رہیں گے۔

حکام نے بتایا کہ رش کے باعث مسجد الحرام کا گرانڈ فلور صبح 10 بجے سے پہلے ہی مکمل بھر گیا تھا جس کے باعث سعودی حکام مزید زائرین کو اوپری منزلوں اور حرم کی نئی توسیع کی جانب بھیج رہے ہیں۔

انہوں نے بتایا کہ مکہ مکرمہ میں آج 40 ہزار سے زائد سرکاری عازمین حج موجود ہیں، شام تک 3 ہزار عازمین مدینہ منورہ میں قیام مکمل کرکے مکہ پہنچیں گے

جبکہ شام تک 26 سو سے زائد عازمین براستہ جدہ مکہ مکرمہ پہنچیں گے۔حکام کے مطابق نماز جمعہ کے بعد پاکستانی عازمین حج کو بسوں پر ان کی رہائش گاہوں تک پہنچایا گیا۔