اسلام آباد (این این آئی)الیکشن کمیشن میں پی ٹی آئی ممنوعہ فنڈنگ ضبطگی سے متعلق شوکاز نوٹس پر سماعت کے دور ان تحریک انصاف کے وکیل انور منصور نے کہاہے کہ نا معلوم افراد دفتر سے سارا ریکارڈ اْٹھا کر لے گئے ہیں،، ریکارڈ کی عدم موجودگی پر کیا دلائل دیں؟

جبکہ ، چیف الیکشن کمشنر نے کہا ہے کہ سیاسی جماعتوں پر ایسے حالات آتے رہتے ہیں، زیادہ پریشان ہونے کی ضرورت نہیں،انتخابی ادارے نے پی ٹی آئی وکیل کی جواب جمع کرانے کیلئے مزید وقت دینے کی استدعا منظور کرلی۔ منگل کو تحریک انصاف کی ممنوعہ فنڈنگ کی ضبطگی سے متعلق شوکاز نوٹس پر سماعت چیف الیکشن کمشنر سکندر سلطان راجہ کی سربراہی میں 3 رکنی کمیشن نے کیس کی سماعت کی۔ چیف الیکشن کمشنر اور پی ٹی آئی وکیل میں دلچسپ جملوں کا تبادلہ ہوا ۔پی ٹی آئی وکیل انور منصور نے کہا کہ نامعلوم افراد ہمارے آفس سے تمام ریکارڈ اٹھا کر لے گئے ہیں،ریکارڈ کی عدم موجودگی پر کیا دلائل دوں؟۔انور منصور نے جواب جمع کرانے کیلئے مزید وقت دینے کی استدعا کردی۔ چیف ا لیکشن کمشنر نے ریمارکس دیئے کہ پاکستان میں سیاسی جماعتوں پر ایسے حالات آتے رہتے ہیں۔اس پر بہت زیادہ پریشان ہونے کی ضرورت نہیں۔ 10 ماہ بعد بھی آج تک جواب جمع نہیں کرایا گیا۔ اس پر پی ٹی آئی وکیل نے کہا ابتدائی جواب تو پہلے ہی فائل کرچکا ہوں۔پی ٹی آئی وکیل نے جواب جمع کرانے کیلئے مزید وقت دینے کی استدعا کی۔ الیکشن کمیشن نے استدعا منظور کرتے ہوئے مزید چار ہفتوں کا وقت دیدیا اور کیس کی مزید سماعت 6 جولائی تک ملتوی کردی۔