ایبٹ آباد(این این آئی)پاکستان ڈیموکریٹک موومنٹ کے ترجمان حافظ حمد اللہ نے کہا ہے کہ پی ڈی ایم نے اپنی سیاست کو ڈبویا اور ملک کو بچایا ہے، عام انتخابات 5سال مکمل ہونے پر ہی ہوں گے۔
پریس کانفرنس کرتے ہوئے ترجمان پی ڈی ایم حافظ حمد اللہ نے کہاکہ پاکستان تحریک انصاف سیاسی جماعت ہی نہیں ہے، 9مئی کو تحریک انصاف کے غنڈوں کو عمران خان نے ملکی اور قومی اداروں پر حملہ کرنے کا کہا، منصوبہ بندی کے تحت فوجی تنصیبات پر حملہ ہوا۔انہوں نے کہاکہ تحریک انصاف سے استعفے دینے والے اگر 9مئی کے واقعات میں ملوث ہیں تو انہیں بھی گرفتار کیا جائے اور آئین کے مطابق سزا دی جائے، علی وزیر کو تقریر کرنے پر26ماہ جیل میں رکھا اور ریاست پر حملہ کرنے والے کیخلاف کوئی کارروائی نہیں۔ترجمان پی ڈی ایم نے کہاکہ سیاسی لوٹے جنہوں نے تحریک انصاف کو چھوڑا ہے،ان کو پی ڈی ایم میں شامل کچھ جماعتوں نے دعوت دی ہے،یہ دہشت گرد ہیں،ان کو کسی پارٹی میں شامل نہ کیا جائے،جمہوریت پر یقین رکھنے والی جماعتیں ان لوٹوں کو پارٹی میں نہ لیں۔
