ملتان (مانیٹرنگ، این این آئی)پاکستان تحریک انصاف پی پی حلقہ 212 کے امیدوار سلیم لابر نے پی ٹی آئی کی بنیادی رکنیت سے مستعفی ہونے اور ٹکٹ واپس کرنے کا اعلان کر دیا ہے یہ اعلان انہوں نے پریس کلب میں مختصر پریس کانفرنس کے دوران کیا۔انہوں نے کہا کہ میں نے شرافت اور بردباری کی سیاست کے سفر کا آغاز کیا تاہم 9 مئی کے واقعات نے مجھے پریشان کرکے رکھ دیا یہ انتہائی افسوس ناک واقعہ ہے جس کی وجہ سے دل رنجیدہ ہے۔

انہوں نے کہاکہ ہم پاک فوج کے شانہ بشانہ کھڑے ہیں پاک فوج ملک وقوم کا فخر ہے۔ایک سوال کے جواب میں انہوں نے کہا کہ مجھ پر پارٹی چھوڑنے کا کوئی دباؤ نہیں ہے آئندہ کی سیاست کی حکمت عملی کا اعلان بعد میں کروں گا۔ایک اور سوال کے جواب میں انہوں نے کہا کہ میں کارکنوں کو روکنے کے لیے پہنچا اور انہیں روکا جس کی وجہ سے ملتان میں کوئی ناخوشگوار واقعہ پیش نہیں آ یا جہاں تک پارٹی کی جانب سے کوئی ڈائریکشن کی بات ہے ایسی کوئی ڈائریکشن نہیں ملی۔ نو مئی کے بعد سے تحریک انصاف میں استعفوں کا نہ رکنے والا سلسلہ جاری ہے روزانہ کی بنیادوں پر بڑی تعداد میں استعفے آ رہے ہیں اب تک درجنوں رہنما پارٹی چھوڑ چکے ہیں۔