ملتان (این این آئی)پاکستان تحریک انصاف کے وائس چیئرمین شاہ محمود قریشی کے ملتان میں گھر پر پولیس نے رات گئے چھاپہ مارا۔ پولیس کے مطابق زین قریشی کی گرفتاری کیلئے چھاپہ مارا گیا۔پاکستان تحریک انصاف کے وائس چیئرمین شاہ محمود قریشی کو 10 مئی کو گرفتار کیا گیا تھا، انہوں نے رہائی کی مشروط پیشکش ماننے سے انکار کردیا۔

ملتان میں پولیس نے گزشتہ رات شاہ محمود قریشی کے گھر پر ان کے بیٹے زین قریشی کی گرفتاری کیلئے چھاپہ مارا، پولیس کا کہنا ہے کہ زین قریشی کے پرسنل سیکریٹری، ڈرائیور اور ایک ملازم کو حراست میں لیا گیا ہے۔پولیس کے مطابق شاہ محمود قریشی کے گھر سے اب تک 18 ملازمین کو حراست میں لیا جاچکا ہے۔واضح رہے کہ چیئرمین پی ٹی آئی عمران خان کو اسلام آباد ہائیکورٹ سے 9 مئی کو نیب نے رینجرز کی بھاری نفری کی مدد سے گرفتار کیا تھا، جس کے بعد ملک بھر میں پی ٹی آئی کارکنان کی جانب سے پرتشدد مظاہرے شروع ہوگئے تھے۔