اسلام آباد (مانیٹرنگ ڈیسک) چیئرمین تحریک انصاف و سابق وزیراعظم عمران خان کی امریکی رکن کانگریس میکسین مور واٹرز کے ساتھ گفتگو کی مبینہ آڈیو لیک منظر عام پر آ گئی۔ اس آڈیو میں عمران خان نے کانگریس کی خاتون رکن کو کہا کہ 99 فیصد پاکستان میرے ساتھ ہیں۔

اس موقع پر انہوں نے تحریک عدم اعتمادکا سارا ملبہ سابق آرمی چیف پر ڈال دیا اور کہا کہ پاکستان تاریخ کے نازک ترین دور سے گزر رہا ہے، مجھے گولیاں ماری گئیں اور تاریخ کا بدترین ریاستی جبر ہم پر ہو رہا ہے۔ اس موقع پر عمران خان نے کہا کہ چاہتا ہوں آپ کی جانب سے ہمارے حق میں آواز بلند ہو، آپ اگر امریکہ سے ہمارے لیے آواز اٹھائیں گے تو اس کے اثرات ہوں گے۔

مبینہ لیک آڈیو میں عمران خان نے مزید کہا کہ ہماری حکومت معاشی اعتبارسے بہت بہتر کام کر رہی تھی، میری حکومت کی معاشی کارکردگی گزشتہ سترہ سالوں میں سب سے بہترین تھی۔ پاکستان کی کسی جمہوری جماعت کیخلاف تاریخ میں اتنا کریک ڈاؤن نہیں ہوا۔ آپ جانتی ہیں بنیادی حقوق، ہم بس اتنا چاہتے ہیں کہ آپ ایک بیان دیں کہ یہاں کیا ہو رہا ہے اس سے ہمیں بہت مدد ملے گی۔ انہوں نے گفتگو میں کہا کہ ہم صرف قانون کی حکمرانی اور آئین کی سربلندی چاہتے ہیں، انسانی حقوق کیلئے اور قانون کی حکمرانی کیلئے آپ آواز اٹھائیں۔