تاشقند (این این آئی )تاشقند میں افغانستان، پاکستان اور ازبکستان کے درمیان افغان ٹرانس ریلوے پروجیکٹ کا مشترکہ دفتر کھولنے کا اعلان کیا گیا ہے۔افغانستان ریلوے اتھارٹی کے پریس آفس نے لکھا کہ یہ دفتر تاشقند شہر میں اتھارٹی کے جنرل ڈائریکٹر ملا بخت الرحمن شرافت اور پاکستان اور ازبکستان ریلوے کے حکام کے درمیان سہ فریقی مشترکہ اجلاس کے بعد قائم کیا گیا ہے۔
خبر میں کہا گیا کہ مذکورہ دفتر کے قیام کا مقصد افغان ٹرانس ریلوے کے منصوبے کو مشترکہ طور پر آگے بڑھانا ہے،اس مقصد کے لیے کابل میں ایک اور دفتر بھی فعال کیا جائے گا۔ بیان میں کہا گیا کہ ان تینوں ممالک کے ریلوے انتظامیہ کے حکام کے درمیان ہونے والے معاہدے کے مطابق اس منصوبے پر اگلی میٹنگ آئندہ ماہ اسلام آباد میں پاکستان کی میزبانی میں ہوگی۔ واضح رہے کہ ٹرانس افغان ریلوے منصوبہ پاکستان کو افغانستان کے راستے ازبکستان سے ملاتا ہے۔
