لاہور( این این آئی)پاکستان تحریک انصاف کے چیئر مین عمران خان نے کہا ہے کہ بزدل آدمی لیڈر نہیں بنتا نواز شریف بن جاتا ہے،ہم حقیقی آزادی کے لیے جدوجہد کررہے ہیں جس کے لیے ساری قوم تیار رہے کیونکہ چوروں کے ٹولے کو سہولت کاروں نے ہمارے اوپر یہ سمجھ کر مسلط کیا ہے کہ

ہم غلام ہیں مگر کلمے کی طاقت انسان کو خوف سے آزادی دیتی ہے۔زمان پارک میں کارکنان سے خطاب کرتے ہوئے عمران خان نے کہا کہ میں اسلام کا سکالر نہیں ہوں اپنی زندگی سے سب سیکھا، انسان کو اندر کی آزادی لا الہ الا اللہ دیتا ہے اور معاشرے کی آزادی انصاف دیتا ہے، جوانقلاب اللہ کے نبی ﷺ لے کر آئے ویسا انقلاب دنیا میں کہیں نہیں آیا۔انہوںنے کہا کہ جنگ بدر میں 313سپاہی تھے، گیارہ سال بعد خالد بن ولید کی لیڈر شپ کے سامنے رومن فوج نے گھٹنے ٹیک دیئے، عربوں کو اللہ کے نبی ﷺ نے آزادی دی، آزاد لوگ آزادی کے لیے کھڑے ہوتے ہیں، غلام لوگ آزادی کی جنگ نہیں لڑتے۔انہوں نے کہا کہ ہماری آزادی کی جنگ ہے جس کے لیے ساری قوم کو تیار ہونا ہے، چوروں کے ٹولے کو سہولت کاروں نے ہمارے اوپرغلام سمجھ کر بٹھا دیا ہے۔انہوں نے کہا کہ علی امین کو گرفتار کر لیا گیا یہ بتانے کے لیے کہ ہم غلام ہیں۔