اوول( آن لائن )انگلینڈ اور آسٹریلیا کی ٹیموں کے درمیان ایشز سیریز کا پانچواں اور آخری ٹیسٹ میچ (آج) جمعرات سے اوول میں شروع ہوگا۔ آسٹریلیا کی ٹیم کو میزبان ٹیم کے خلاف پانچ میچوں پر مشتمل ایشز سیریز میں 2-1 کی برتری حاصل ہے۔

کینگروز نے میزبان ٹیم کو پہلے ایشز ٹیسٹ میچ میں 251 رنز سے شکست دی تھی جبکہ دونوں ٹیموں کے درمیان دوسرا ٹیسٹ میچ ہار جیت کے فیصلے کے بغیر ختم ہوگیا تھا اس کے بعد میزبان ٹیم نے شاندار کم بیک کرتے ہوئے مہمان ٹیم کو تیسرے ٹیسٹ میچ میں 1 وکٹ سے شکست دیکر سیریز 1-1 سے برابر کر دی تھی۔آسٹریلوی ٹیم نے چوتھے ٹیسٹ میچ میں شاندار کارکردگی کا مظاہرہ کرتے ہوئے میزبان ٹیم کو 185 رنز سے شکست دیکر دوبارہ انگلینڈ کے خلاف 2-1 کی برتری حاصل کرلی۔ایشز کا پانچواں ٹیسٹ میچ اس اعتبار سے اہمیت کا حامل ہے کہ کینگروز یہ میچ اگر برابر کھیلتے ہیں تب بھی وہ ایشز کے فاتح قرار پائیں گے جبکہ انگلینڈ کی ٹیم کو ایشز سیریز برابر کرنے کے لئے پانچواں ٹیسٹ جیتنا ضرور ہوگا۔ دونوں ٹیموں کے کپتانوں نے ایشز سیریز کے پانچویں اور آخری ٹیسٹ میچ میں کامیابی کے لئے بیانات دیئے ہیں اسلئے آخری ٹیسٹ میچ میں سخت مقابلے کی توقع کی جا رہی ہے۔ آسٹریلیا اور انگلینڈ کے درمیان پانچواں اور آخری ٹیسٹ میچ جمعرات سے اوول میں شروع ہوگا۔

موضوعات:انگلینڈ،آسٹریلیا،کرکٹ ٹیمیں،آخری ٹیسٹ میچ