اسلام آباد(مانیٹرنگ ڈیسک)پاکستان سپرلیگ کا پہلا افتتاحی میچ ملتان سلطانز نے اپنے نام کر لیا ہے۔ ملتان سلطانز نے پی ایس ایل سیکنڈ ایڈیشن کی فاتح ٹیم پشاور زلمی کو اپنے پہلے ہی میچ میں آئوٹ کلاس کرتے ہوئے فتح اپنے نام کی۔ ملتان سلطانز کے کپتان شعیب ملک نے کامیابی کا سہرا بیٹنگ لائن کو قرار دیا ہے۔ ان کا کہنا تھا کہ رنز کے ہدف میں ہمیشہ مشکلات پیش آتی ہیں اور ہدف کے

تعاقب میں پریشر بھی آپ کا تعاقب کر رہا ہوتا ہے تاہم مخالف ٹیم بھی اسی صورتحال سے نبردآزما ہوتی ہے۔ شعیب ملک نے پی ایس ایل تھرڈ ایڈیشن کے پہلے افتتاحی میچ میں سنگاکارا اور محمد عرفان کو جیت کا ہیرو قرار دیتے ہوئے کہا کہ سنگا کارا نے بہترین بیٹنگ کا مظاہرہ کیا ،ان کے 57رنز سے ٹیم کو بہت سہارا ملاجبکہ محمد عرفان نے باؤلنگ کے شعبے میں بھی بہترین کارکردگی دکھائی،ان کے قد کی وجہ سے بلے بازوں کوانہیں کھیلنے میں مسئلہ آتا ہے۔شعیب ملک کا کہنا تھا کہ پچ دیکھ کر اندازہ ہو گیا تھا کہ گیند سوئنگ ہوگی اس لئے ٹاس جیت کر پہلے بائولنگ کا فیصلہ کیا۔ خیال رہے کہ پی ایس ایل کی نئی ٹیم ملتان سلطان نے تھرڈ ایڈیشن کے افتتاحی میچ میں پی ایس ایل سیکنڈ ایڈیشن کی فاتح ٹیم پشاور زلمی کو ایک سنسنی خیز مقابلے کے بعد آخری اوور کی پہلی گیند پر ہدف کا تعاقب کرتے ہوئے شکست سے دوچار کیا۔ ملتان سلطانز نے پشاور زلمی کو 7وکٹ سے شکست دی۔خیال رہے کہ گزشتہ روز پاکستانی وقت کے مطابق رات 10بجے پی ایس ایل کا پہلا افتتاحی میچ کھیلا گیا تھا جبکہ اس سے قبل پاکستانی وقت کے مطابق رات 8بجے پی ایس ایل کی شاندار افتتاحی تقریب دبئی کرکٹ سٹیڈیم میں منعقد کی گئی جس نے دیکھنے والوں کی آنکھوں کو حیرہ کر دیا۔ جدید ٹیکنالوجی اور لیزر لائٹس کی چکا چوند نے گرائونڈ کو کسی اور ہی دنیا کا قطعہ بنا دیا تھا۔

موضوعات:پشاور زلمی پی ایس ایل شعیب ملک ملتان سلطانز