اسلام آباد (این این آئی، آن لائن)اسسٹنٹ اٹارنی جنرل سردار محمد مصروف خان نے استعفیٰ دے دیا۔میڈیا رپورٹ کے مطابق اسسٹنٹ اٹارنی جنرل نے اپنا استعفیٰ صدر مملکت عارف علوی کو بھیج دیا ۔

سردار مصروف خان اسلام آباد ہائی کورٹ میں جسٹس بابر ستار کی عدالت میں پیش ہوتے تھے ،اس سے قبل ڈپٹی اٹارنی جنرل طیب شاہ بھی مستعفی ہو چکے ہیں۔دوسری جانب چیئر مین رحمةاللعالمین اتھارٹی ڈاکٹر انیس احمد مستعفی ہو گئے۔ اتھارٹی کے چیئرمین ڈاکٹر انیس نے استعفیٰ وزیر اعظم کو بھیج دیا، ذرائع کا کہنا ہے کہ رحمتہ اللعالمین اتھارٹی کی مدت 10 جون کا ختم ہوجائے گی۔ اتھارٹی کی تحلیل سے موجودہ تمام ممبران بھی فارغ ہوجائیں گے، حکومت نیشنل رحمةاللعالمین اتھارٹی کا ترمیمی بل لانے کی تیاری کر رہی ہے ۔ اس سلسلے میں وزارت تعلیم وپیشہ وارانہ تربیت میں اعلی سطح کا اجلاس منعقد ہوا ۔ وزیراعظم کی ہدایت پر اتھارٹی کو برقرار رکھنے کا فیصلہ کیا گیا ہے ۔ گزشتہ حکومت نے نیشنل رحمةا للعالمین اتھارٹی کا آرڈیننس پیش کیا تھا۔ اتھارٹی سے متعلق آرڈیننس چار ماہ تک ایکٹ نہ بن سکا۔ اتھارٹی آرڈیننس دوسری مرتبہ توسیع کے بعد 10 جون کو ختم ہوجائے گا۔

موضوعات:استعفے