راولپنڈی(مانیٹرنگ ڈیسک) سال نو کی خوشیاں منانے ملکہ کوہسار مری میں سیاحوں کا سیلاب امڈ آیا جب کہ سیاحوں کے ہجوم کو پولیس کے کچھ اہلکاروں نے پیچھے دھکیلتے ہوئے اچانک لاٹھی چارج شروع کر دیا۔تفصیلات کے مطابق سال2022 کو خوش آمدیدکہنے اورنئے سال کی خوشیاں

منانے ملکہ کوہسار مری میں سیاحوں کا سیلاب امڈ آیا اور مال روڈ پر تل دھرنے کی جگہ نہ رہی جن میں بڑی تعداد منچلوں کی تھی جو ہر سال کی طرح اس باربھی نئے سال کا جشن منانے مری پہنچے تھے۔نیو ایئر نائٹ کے موقع پر پولیس کی400 اضافی نفری بھی تعینات کی گئی تھی نیو ائیر نائٹ کا آغاز ہوتے ہی سیاحوں کے ہجوم کو پولیس کے کچھ اہلکاروں نے پیچھے دھکیلتے ہوئے اچانک لاٹھی چارج شروع کر دیا جس سے سیاحوں میں شدید بھگڈر مچ گئی۔ متعددسیاح گر کر شدید زخمی ہوگئے جبکہ مبینہ طور پر لاٹھی چارج کے دوران ایک سیاح اپنی ایک آنکھ کی بینائی سے محروم ہوگیا جس کو بینظیر ہسپتال راولپنڈی منتقل کر دیا گیا جبکہ دیگر زخمی ہونے والے زخمی سیاحوں کو تحصیل ہیڈکوارٹر ہسپتال مری لایا گیا۔پولیس نے متعدد سیاحوں کو حراست میں بھی لے لیا، دھکم پیل سے کئی سیاح بے ہوش ہو گئے، بھگدڑ کے دوران متعدد سیاح قیمتی موبائل اور سامان سے بھی ہاتھ دھو بیٹھے۔اسسٹنٹ کمشنر مری محمد عمر مقبول، ایس پی صدرطارق، اے ایس پی مری احمد شاہ، ایس ایچ او مری راجہ رشید جی پی او کے آگے موجود تھے اور یہ بھی معلوم نہ ہو سکا کہ پولیس کو لاٹھی چارج کا حکم کس نے دیا۔

موضوعات:مری