اسلام آباد (آن لائن) الیکشن کمیشن آف پاکستان نے حکومتی رویہ کیخلاف بڑا اقدام اٹھانے پر غور شروع کرتے ہوئے جوڈیشل آرڈر جاری کرنے کا فیصلہ کر لیا ۔ ذرائع کا کہنا ہے کہ الیکشن کمیشن بلدیاتی و

کنٹونمنٹ بورڈ انتخابات پر وفاقی و صوبائی حکومتوں کے رویہ سے شدید نالاں ہے ۔بلدیاتی انتخابات پر صوبائی حکومتیں مختلف حیلے بہانوں سے کام لے رہی ہیں،صوبائی حکومتیں بلدیاتی انتخابات کے حوالہ سے جمہوری عمل میں رخنہ اندازی کی کوشش کررہی ہیں، وفاقی حکومت بلدیاتی انتخابات سے متعلق واضح اور دو ٹوک حکمت عملی اختیار کرے۔ذرائع کا مزید کہنا ہے کہ وفاقی حکومت کوئی ایسی قانون سازی کرے تاکہ صوبائی حکومتوں کو بلدیاتی انتخابات سے راہ فرار نہ ملے۔ کنٹونمنٹ بورڈ الیکشن کے حوالہ سے وفاقی حکومت کا رویہ بھی انتہائی نامناسب ہے ۔ کنٹونمنٹ بورڈ الیکشن نے فنڈز کے لیے پہلی بار الیکشن کمیشن کو ای سی سی کی راہ دکھائی۔ الیکشن کمیشن کو کنٹونمنٹ بورڈ انتخابات کے فنڈزکے لیے صدر مملکت اور وزیراعظم آفس سے رجوع کرنا پڑا۔

موضوعات:الیکشن کمیشن