اسلام آباد ( این این آئی) پاکستان پیپلزپارٹی نے وزیراعظم کے بیان کو مایوس کن قرار دے دیا۔ ایک بیان میں نفیسہ شاہ نے کہاکہ وزیراعظم کا خطاب عوام کے قتل عام کے مترادف ہے۔ انہوںنے کہاکہ وزیراعظم نے خطاب میں زندگیاں بچانے کی بجائے لوگوں کے مرنے کا فارمولا دیا۔ انہوںنے کہاکہ وزیراعظم کے بیان سے عوام مزید مایوسی کا شکار ہوئی۔انہوںنے کہاکہ ٹائیگر فورس کو کورونا کا ٹاسک دینا مضحکہ خیز اور طبی عملے کی خدمات کے اعتراف سےانحراف ہے، ٹائیگر فورس کی کوئی قانونی حیثیت نہیں۔ڈاکٹر نفیسہ شاہ نے کہاکہ عمران خان کو ڈاکٹرز اور دیگر طبی
عملے کی زندگیوں کا کوئی احساس نہیں۔ ڈاکٹر نفیسہ شاہ نے کہاکہ عمران خان وزیراعظم ہاوس سے باہر نکل کر ہسپتالوں کا دورہ کرکے ڈاکٹر سے ملاقات کریں تو حقائق ان کے سامنے آجائیں گے۔ انہوںنے کہاکہ ملک میں کورونا سے تشویشناک حد تک اموات ہو رہی ہیں، کورونا کے باعث اموات کے درست اور اصل اعداد و شمار سامنے نہیں لائے جا رہے۔