اسلام آباد(آن لائن) وزیر خارجہ شاہ محمود قریشی نے کہا ہے کہ وزیراعظم نے ایل او سی پر جوانوں کی حوصلہ افزائی کی، گولہ باری سے متاثرین سے ملاقات کی۔ نجی ٹی وی سے گفتگو کرتے ہوئے شاہ محمود قریشی نے کہا کہ وزیراعظم نے جمعہ کے روز ایل او سی کا آرمی چیف کے ہمراہ دورہ کیا اور جوانوں سے ملاقات کی عمران خان نے جوانوں کی حوصلہ افزائی کی دورے کے موقع پر وزیراعظم بھارتی فائرنگ سے متاثر ہونے والے لوگوں سے بھی ملاقات کی

انہوں نے کہا کہ ہفتہ کے روز چین اور افغانستان کے وزرائے خارجہ پاکستان آرہے ہیں جن سے کشمیر کی صورتحال پر تبادلہ خیال ہوگا، شاہ محمود قریشی کا کہنا تھا کہ مقبوضہ کشمیر میں انسانی حقوق کی خلاف ورزیاں جاری ہیں بھارت نے اقوام متحدہ کی قراردادوں کے منافی حرکت کی کشمیر کی قیادت قید ہے بھارت سے اچھائی کی کوئی توقع نہیں ان کا کہنا تھا کہ دنیا ثالثی کے ذریعے اپنا کردار ادا کر سکتی ہے بین الاقوامی برادری بھارت کی پالیسی پر نظرثانی کیلئے دباؤ ڈال سکتی ہے، انہوں نے کہا کہ بھارت کی حالیہ شیلنگ سے جانی نقصان ہوا جن ممالک سے ہماری بات ہوئی انہیں کشمیر کی صورتحال پر تشویش ہے ہم نے بھارت کو مذاکرات کی میز پر لانے کیلئے ایک سال کوشش کی، دنیا کو بھارت کی ہٹ دھرمی پر نوٹس لے کر اپنا کردار ادا کرنا چاہئے، انہوں نے کہا کہ ممالک کے معاشی مفادات ہوتے ہیں مصلحت بھی سامنے ہے عالمی میڈیا اب کھل کر کشمیر کی صورتحال پر بات کر رہا ہے اور بھارت کے ناپاک عزائم کو سامنے لارہا ہے انسانی حقوق کی تنظمیں بھی بھارت پر تنقید کر رہی ہیں یورپین ممالک، یو ایس کانگریس ممبران بھی بھارت پر تنقید کر رہے ہیں، انہوں نے کہا کہ انسانی حقوق کی تنظیم کے نمائندے سے رابطہ ہوا انہیں بھی مقبوضہ کشمیر کی صورتحال پر تشویش ہے،9تاریخ کو انسانی حقوق کمیشن کا اجلاس ہو رہا ہے جس میں اپنا موقف بیان کریں گے، وزیراعظم کا اقوام متحدہ کی جنرل اسمبلی سے خطاب بھی صورتحال کے مطابق ہو گا۔

موضوعات:شاہ محمود قریشی