اسلام آباد(این این آئی)پاکستان ٹیلی ویژن کارپوریشن کے مینجنگ ڈائریکٹرارشد خان نے ایک بیان میں کہا ہے کہ پی ٹی وی نے بدانتظامی، اقربا پروری، کرپشن اور بیرونی مداخلت کی وجہ سے بے انتہا نقصان اٹھایا ہے اور ایسی روایات اب چلنے نہیں دی جائیں گی۔ پی ٹی وی ایک قومی اثاثہ ہے اور وہ پاکستان کی نظریاتی سرحدوں کی حفاظت کے لئے اپنا کردار ادا کرتا رہے گا۔

انہوں نے کہا کہ وزیر اعظم عمران خان کی ہدایات کے عین مطابق پی ٹی وی کا بورڈ اور انتظامیہ درپیش مسائل کو حل کر رہی ہے اور بطور ادارہ اس کی تشکیل نو کے کام کا آغاز کرچکی ہے۔ وزیر اعظم بی بی سی کی طرز پر اس ادارے کو آزاد، خود مختاراور موثر قومی نشریاتی ادارہ دیکھنا چاہتے ہیں۔ ایک ایسا پبلک سروس ادارہ جو معاشرے میں ملک کے مثبت پہلوؤں کو اجاگر کرتے ہوئے امید کی راہیں روشن کرے، اور ہم اسی ایجنڈے پر عمل پیراہیں۔انہوں نے اس بات پر زور دیا کہ اس قومی ادارے کے خلاف چند عناصر کی جانب سے کی جانے والی ہرزہ سرائی اور اسے بند کرنے یا بیچنے کی مذموم سازشوں کی ہر سطح پر بیخ کنی کی جائے گی۔انہوں نے کہا کہ پی ٹی وی کا اصل اثاثہ اس کے ملازمین ہیں اور وہ کسی بھی ایسے ایجنڈے کے لئے آلہ کار نہیں بنیں گے۔ارشد خان نے کہاکہ پی ٹی وی کی موجودہ انتظامیہ جدید دور کے چیلنجز سے بخوبی واقف ہے اور اسے موثر قومی ادارہ بنانے کے لئے اسے جدید خطوط پر استوار کرنے کی اہمیت کو سمجھتی ہے۔ پی ٹی وی تمام پاکستانیوں کا وقار ہے کیونکہ اس نے نہ صرف پاکستان کے نظریات کی درست عکاسی کی ہے بلکہ پوری قوم کو یکجا کیا ہے۔ انہوں نے کہا کہ بہت جلد ناظرین کو ایک متحرک اور قومی تشخص کا اجاگر کرنے والے قومی چینل کے طور پر دیکھیں گے۔

موضوعات:ارشد خان