اسلام آباد(مانیٹرنگ ڈیسک)بہائو الدین زکریاؒ کے عرس کی تقریب کے دوران گدی نشین اور تحریک انصاف کے وائس چیئرمین شاہ محمود قریشی کے بھائی مرید حسین قریشی نے مرید پر تھپڑوں کی بارش کر دی، مرید ہاتھ جوڑ کر معافی مانگتا رہا، آخر پائوں پڑ گیا جس پر مرید حسین کا غصہ تھما، درگاہ کو سیاسی مقاصد کیلئے استعمال نہیں ہونا چاہئے ،سٹیج پر شاہ محمود قریشی کے

ساتھ گلے شکوے، خطاب کے دوران بھی تحفظات کا اظہار،شاہ محمود قریشی نے معاملات عرس تقریبات کے بعد ڈسکس کرنے کا کہہ دیا۔ تفصیلات کے مطابق ملتان میں بہائو الدین زکریاؒکے عرس کی تقریبات شروع ہو چکی ہیں جس کے آغاز کے موقع پر زائرین کی ایک بڑی تعداد بھی موجود ہے۔ عرس تقریبات کے دوران اس وقت ایک ناخوشگوار واقعہ میڈیا کے کیمروں میں محفوظ ہو گیا جب ایک زائر گدی نشین اور تحریک انصاف کے وائس چیئرمین شاہ محمود قریشی کے بھائی مرید حسین قریشی کے سامنے آگیا جس پر وہ آگ بگولہ ہو گئے اور انہوں نے مرید پر تھپڑوں کی بارش کر دی، مرید ہاتھ باندھے معافیاں مانگتا رہا مگر مرید قریشی کا غصہ ٹھنڈا نہ ہوا جس پر زائر مرید قریشی کے پائوں پڑ گیا ۔ اس موقع پر مرید حسین قریشی نے سٹیج پر پہنچ کر اپنے بھائی شاہ محمود قریشی سے بھی گلے شکوے کئے۔ مرید حسین قریشی کا کہنا تھا کہ درگاہ اور روحانی پوزیشن کو سیاست کیلئے استعمال نہیں کرنا چاہئے، مرید حسین قریشی کا کہنا تھا کہ وہ بھی اسی خانوادے کا حصہ ہیں ، خطاب کے دوران بھی انہوں نے اپنے تحفظات کا اظہار کیا جس پر وہاں موجود شاہ محمود قریشی نے انہیں معاملات عرس تقریب کے بعد ڈسکس کرنے کا کہا۔ نجی ٹی وی جیو نیوز کی رپورٹ کے مطابق مرید حسین قریشی جب مرید پر تھپڑوں کی بارش کر رہے تھے

تو اس وقت ان کے منہ پر یہی الفاظ تھے کہ تمہاری جرأت کیسے ہوئی کہ تم میرے سامنے آئے ، میں تمہیں بھی جانتا ہوں اور تمہارے خاندان کو بھی ، تم نے مجھے راستہ نہیں دیا اور زین قریشی کے پیچھے چلے پڑے۔ وہاں موجود جیو نیوز کے رپورٹر احمد بزدار کے مطابق جب تقریب میں شاہ محمود قریشی اور ان کے صاحبزادے زین قریشی وہاں سے جانے لگے تو ان کے

پیچھے مرید حسین قریشی بھی موجود تھے اس دوران زائرمحبت اور عقیدت کے تحت زین حسین قریشی کے پیچھے چلنے لگا اس اعتراض پر کہ مرید میرے سامنے کیوں آیا مرید حسین قریشی نے مرید پر بھرے دربار میں تھپڑوں کی بارش کر دی۔ اس کے بعد مرید حسین قریشی دربار کے احاطے میں منعقدہ زکریاؒ کانفرنس میں پہنچ گئے اور خطاب کرتے ہوئے شاہ محمود قریشی پر

اعتراضات اٹھانے لگے کہ درگاہ کو سیاست کیلئے استعمال کیا جا رہا ہے۔ اس حوالے سے جب شاہ محمود قریشی کا موقف جاننے کی کوشش کی گئی تو ان سے رابطہ نہ ہو سکا۔مرید حسین قریشی زائر کےاوپر کیسے تشدد کرتے رہے۔۔ویڈیو ملاحظہ کریں!

موضوعات:بہائو الدین زکریا ؒ عرس زائر زین قریشی شاہ محمد قریشی مرید حسین قریشی