کراچی (این این آئی)سندھ نیشنل فرنٹ کے پاکستان تحریک انصاف میں انضمام کے لیے معاملات طے پاگئے ہیں ۔پی ٹی آئی کے چیئرمین عمران خان نے انضمام کے لیے سندھ نیشنل فرنٹ کی تمام شرائط کو تسلیم کرلیا ہے ۔19ستمبر کو پی ٹی آئی کے چیئرمین عمران خان لاڑکانہ کا دورہ کریں گے جہاں پر 10محرم الحرام کے لاڑکانہ میں جلسہ عام کا اعلان کیا جائے گا ۔

ذرائع کے مطابق جمعہ کو سندھ نیشنل فرنٹ کے رہنما امیر بخش بھٹو نے بنی گالہ میں پاکستان تحریک انصاف کے چیئرمین عمران خان سے ملاقات کی ہے ۔ملاقات میں سندھ نیشنل فرنٹ کے پاکستان تحریک انصاف میں انضمام کے حوالے سے بات چیت کی گئی ۔امیر بخش بھٹو نے عمران خان کو ایس این ایف کے پی ٹی آئی میں انضمام کے حوالے سے اپنے مطالبات پیش کیے ۔امیر بخش بھٹو نے عمران خان پر واضح کیا کہ انضمام کی صورت میں پاکستان تحریک انصاف پیپلزپارٹی اور ایم کیو ایم لندن سے کسی صورت مفاہمت نہیں کرے گی ۔2018کے انتخابات کے بعد اگر پاکستان تحریک انصاف حکومت بنانے میں کامیاب ہوجاتی ہے تو سندھ نیشنل فرنٹ کے ساتھ پیپلزپارٹی کے 9سالہ دور حکومت میں ہونے والی زیادتیوں کا ازالہ کیا جائے گا ۔بھٹو خاندان کے اصل وارث ہم ہیں ۔پی ٹی آئی حکومت مل جانے کی صورت میں بے نظیر بھٹو قتل کی دوبارہ تحقیقات کرائے گی ۔ذرائع نے بتایا کہ عمران خان نے امیر بخش بھٹو کی جانب سے پیش کیے گئے تمام مطالبات مان لیے ہیں ،جس کے بعد یہ فیصلہ ہوا ہے کہ چیئرمین پی ٹی آئی 19ستمبر کو حیدرآباد میں جلسہ عام سے خطاب کے بعد لاڑکانہ کا دورہ کریں گے اور وہاں ہونے والے اجلاس میں ان معاملات کو حتمی شکل دی جائے گی ۔ذرائع کا کہنا ہے کہ اس اجلاس میں 10محرم الحرام کے بعد لاڑکانہ میں جلسے کی تاریخ کا اعلان کیا جائے گا ۔جلسے سے عمران خان اور سردار ممتاز بھٹو خطاب کریں گے ۔اسی جلسے میں سندھ نیشنل فرنٹ کے پاکستان تحریک انصاف میں انضمام کا باضابطہ اعلان کیا جائے گا ۔

موضوعات:پاکستان تحریک انصاف