لاہور ( این این آئی) سابق رکن پنجاب اسمبلی سیمل راجہ نے کہا ہے کہ میری جنگ میرے خاوند راجہ بشارت کے خلاف نہیں بلکہ اس نظام کے خلاف ہے جس کی وجہ سے کئی خاندان تباہ اور خواتین کی زندگیاں برباد ہوئیں، راجہ بشارت اس سے پہلے بھی ایک شادی سے مکر چکے ہیں ۔ میڈیا کو جاری کیے گئے ایک بیان میں انہوں نے کہا کہ کسی جائز رشتے کے بغیر شادی شدہ عورتوں کے گھر خراب کر کے ان کو بیوی کی حیثیت سے اپنے ساتھ رکھنے کی نہ تو مذہب اجازت دیتا ہے نہ ہی قانون اورمعاشرہ۔

راجہ بشارت جھوٹے بیان چھپوا کرمتعلقہ پری گل آغاکو بیوی نہیں بنا سکتے ۔ کیونکہ وہ اس کو طلاق دے چکے ہیں ۔ انہوں نے کہا کہ اسلام آباد پریس کانفرنس میں راجہ صاحب کی زبانی ان کی قانونی بیوی ہونے کا ثبوت دے چکی ہوں،اب ان کی باری ہے کہ وہ میڈیا کے سامنے آ کر اپنی بات ثابت کریں۔ سیمل راجہ نے کہا کہ اب میں اکیلی نہیں عوام کی طاقت میرے ساتھ ہے ، میری جدوجہد اس فرسودہ نظام اور بھیانک سماجی برائی کے خلاف جس کی بدولت اب تک کئی عورتوں کے گھر اجڑے اور کئی زندگیاں برباد ہوئیں۔انہوں نے کہا کہ راجہ بشارت سے میری شادی اسی ملک میں ہوئی نکاح نامہ جس میں انہوں نے اپنے ہاتھوں سے مجھے متعلقہ اور پری گل سے علیحدگی تحریر کیا میرے پاس موجود ہے۔نکاح خواں اور گواہان اللہ کے فضل و کرم سے زندہ بھی ہیں اور اسی ملک میں موجود ہیں۔ آنیوالے چند روز میں میڈیا کانفرنس کر کے مزید اہم ثبوت سب کے سامنے لاوں گی۔انہوں نے کہا کہ راجہ بشارت ثابت کریں کہ میں ان کی بیوی نہیں۔کچھ بھی ہو جائے اس سماجی برائی کے خلاف اپنی جدوجہد جاری رکھوں گی۔ شہر شہر گاؤں گاؤں جا کر آواز اٹھاؤں گی تاکہ عورتوں کی زندگیوں کا تماشہ بنانے والے سیاستدانوں کا مکروہ چہرہ عوام کے سامنے آ سکے ۔

موضوعات:پری گل آغاک راجہ بشارت سیمل راجہ