پشاور(این این آئی)سابق صوبائی وزیر افتخار الدین خٹک اے این پی میں شامل ہوگئے ،اس سلسلے میں اے این پی کے صوبائی صدر امیر حیدر خان ہوتی اور جنرل سیکرٹری سردار حسین بابک ان کی رہائش گاہ لاچی کوہاٹ گئے اور انہیں باضابطہ طور پر پارٹی میں شمولیت کی دعوت دی ،افتخار الدین خٹک نے دعوت قبول کرتے ہوئے اے این پی میں شمولیت کا اعلان کیا تاہم وہ اپنی شمولیت کا باضابطہ اعلان کوہاٹ میں ایک بہت بڑے جلسہ عام میں سینکڑوں ساتھیوں کے ہمراہ کریں گے۔

اس موقع پر بات چیت کرتے ہوئے پارٹی کے صوبائی جنرل سیکرٹری سردار حسین بابک نے کہا کہ افتخار الدین خٹک کی پارٹی میں شمولیت سے اے این پی کوہاٹ میں مزید مضبوط قوت کے طور پر سامنے آئے گی جبکہ آئندہ چند روز میں جنوبی اضلاع کی ممتاز سیاسی و سماجی شخصیات بھی پارٹی میں شمولیت کاا علان کرنے جا رہی ہیں، انہوں نے مزید کہا کہ صوبے کے طول و عرض میں اے این پی کی بڑھتی ہوئی مقبولیت کی وجہ سے صوبے کی اہم اور ممتاز شخصیات کو پارٹی میں شمولیت کی دعوت دی جا رہی ہے۔

انہوں نے کہا کہ آنے والا دور ایک بار پھر عوامی نیشنل پارٹی کا ہو گا اور2018کے الیکشن میں صوبے کے عوام اے این پی پر اپنے بھرپور اعتماد کا اظہار کریں گے۔ صوبائی جنرل سیکرٹری نے کہا کہ عوام نے جس تبدیلی کیلئے موجودہ حکمرانوں کو ووٹ دیئے اس کا بھانڈا پھوٹ چکا ہے اور صوبائی حکومت ساڑھے تین سال کے عرصے میں بھی مجموعی اہداف کے حصول میں ناکام رہی ہے، انہوں نے کہا اے این پی واحد سیاسی جماعت ہے جو صوبے کے مفادات کی محافظ ہے اور آئندہ الیکشن میں کامیابی کے بعد اے این پی عوام کے تعاون سے صوبے کی ترقی کا سفر پھر سے شروع کرے گی۔

موضوعات:اعلان اے این پی شمولیت صوبائی وزیر افتخار الدین خٹک