اسلام آباد(آن لائن) وزیراعظم عمران خان کو پیٹرول بحران پر رپورٹ پیش کر دی گئی ہے ۔ وزیراعظم نے پٹرول بحران میں ملوث کمپنیوں اور ذمہ داران کے خلاف کاروائی کی ہدایت کردی۔ کمپنیوں کے لائسنس، ملوث افراد کو گرفتار اور ذخیرہ شدہ پیٹرول مارکیٹ میں سپلائی کرنے کا حکم دے دیا۔

ذرائع کے مطابق ملک میں پیٹرول کا بحران مصنوعی قرار، وزیراعظم عمران خان کو رپورٹ پیش کر دی گئی۔ پیٹرول بحران کے ذمہ داروں کا تعین بھی کر دیا گیا۔ اوگرا نے پیٹرول بحران کی ذمہ دار پیٹرولیم ڈویژن پر عائد کر دی، رپورٹ کے مطابق 9 آئل مارکیٹنگ کمپنیوں نے جان بوجھ کر بحران پیدا کیا، ڈی جی آئل ڈ اکٹر شفیع آفریدی اورپٹرولیم ڈویڑن افسران اپنی ذمہ داری پوری کرنے میں ناکام رہے۔ وزیراعظم نے پٹرول بحران میں ملوث کمپنیوں اور ذمہ داران کے خلاف کاروائی کی ہدایت کرتے ہوئے ملوث افراد کو گرفتار اورذخیرہ شدہ پٹرول جبری طور پر مارکیٹ میں سپلائی کرنے کا حکم دے دیا۔ وزیراعظم نے کہا کہ پٹرول بحران کسی صورت برداشت نہیں کیا جائے گا، بحران میں ملوث کمپنیوں کے لائسنس معطل اورمنسوخ کیے جائیں، تمام آئل مارکیٹنگ کمپنیوں کو 21 دن کا ذخیرہ یقینی بنانے کا پابند کیا جائے۔

موضوعات:پیٹرول بحران