اسلام آباد(این این آئی) تحریک انصاف کی حکومت نے وفاقی دارالحکومت میں نیا کمرشل شہر بنانے کی منصوبہ بندی مکمل کرلی۔ تفصیلات کے مطابق وزیراعظم عمران خان”نیو بلیو ایریا“منصوبے کا جائزہ لینے خود سائٹ پر پہنچ گئے،وزیراعظم نے خود سائٹ پر انتظامات کا جائزہ لیا، نیلامی کے طریقہ کار پر بھی بریفنگ دی۔

بریفنگ میں بتایا گیا کہ منصوبے کے لئے ایف 9 پارک کے بالمقابل 170 کنال اراضی مختص کر دی گئی،جدید تعمیرات اور ہائی رائز بلڈنگ پر مبنی کمرشل سٹی عالمی طرز پر تعمیر ہوگا،اوورسیز پاکستانیوں کو سرمایہ کاری کی خصوصی دعوت دی جائے گی، لندن، دبئی، مانچسٹر، شکاگو اور گلاسکو سمیت بڑے شہروں میں روڈ شوز کئے جائیں گے، وفاقی ترقیاتی ادارہ اپریل کے پہلے ہفتے میں کمرشل نیلامی کرے گا، وزیراعظم کی ہدایت پر نیلامی میں حصہ لینے والوں کو سہولت دینے کا بھی فیصلہ کرلیا گیا، وزیراعظم کی ہدایت پر مکمل ایڈوانس ٹیکس دینے کی شرط بھی ختم کر دی گئی،کامیاب بولی دہندگان کو رقم کی ادائیگی کے لئے 30 دن کا وقت ملے گا،اوررسیز پاکستانیوں کو بھی رقم کے انتظام کے لئے مناسب وقت دیا جائے گا،منصوبے سے ابتدائی طور پر حکومت کو 25 سے 30 ارب روپے ملیں گے،حکومت آمدنی کا کچھ حصہ نیا پاکستان ہاوسنگ پراجیکٹ میں استعمال کرے گی،رقم بے گھر اور غریب افراد کے لئے سستے گھروں کی تعمیر پر خرچ ہو گی،منصوبہ سے روزگار میں اضافہ اور معاشی سرگرمیوں سمیت تعمیراتی انڈسٹری کو فروغ ملے گا۔

موضوعات:عمران خان