اسلام آباد (مانیٹرنگ ڈیسک ) آصف زرداری نے شہباز شریف کو وطن واپسی کا مشورہ دے دیا۔میڈیا رپورٹس کے مطابق مولانا فضل الرحمن کو منانے کے لیے آصف علی زرداری نے شہباز شریف کو پیغام بھجوا دیا۔پیپلز پارٹی کے شریک چیئرمین کے معتمد خاص نے شہباز شریف کو مولانا فضل الرحمن کی ناراضی دور کرنے سے متعلق آصف زرداری کا پیغام پہنچایا۔مسلم لیگ ن کے صدر شہباز شریف کو فوری وطن آکر پارلیمان میں اپوزیشن کی قیادت کا بھی مشورہ دیا گیا۔ذرائع کا کہنا ہے کہ آصف زرداری نے اپنے معتمد خاص کے ذریعے بھجوائے گئے پیغام میں شہباز شریف
کو ہر قیمت پر مولانا فضل الرحمن کو منانے اور اپوزیشن اتحاد کو سرگرم کرنے کے لیے کردار ادا کرنے کی تجویز پیش کی۔پاکستان پیپلز پارٹی کے ذرائع کا کہنا ہے کہ سابق صدر نے شہباز شریف کو فوری وطن واپسی کا بھی مشورہ دے دیااور کہا کہ وہ وطن واپس آکر پارلیمان میں اپنا کردار ادا کریں جب کہ جے یو آئی کےقائد مولانا فضل الرحمن کی ناراضی دور کرنے کے لیے دیگر اپوزیشن جماعتوں کے تعاون سے اقدامات بروئے کار لائیں۔جے یو آئی کے قائد مولانا فضل الرحمن اپوزیشن کی دو بڑی جماعتوں مسلم لیگ ن اور پیپلز پارٹی سے پارلیمنٹ میں سروسز ایکٹ ترمیمی بلوں کی یک طرفہ حمایت کرنے پر ناراض ہیں اور انہوں نے اپوزیشن کے پلیٹ فارم سے پیپلز پارٹی اور مسلم لیگ ن کی میزبانی میں ہونے والی سرگرمیوں کا غیر اعلانیہ بائیکاٹ کر رکھا ہے۔