اسلام آباد(آن لائن ) پاکستان پیپلز پارٹی کے چیئرمین بلاول بھٹو ز ر داری کی جانب سے بینظیر انکم سپورٹ پروگرام سے 8 لاکھ سے زائد مستحقین کے اخراج کی شدید مذمت کی گئی ہے ۔ جاری بیان کے مطابق بلاول بھٹو زرداری نے عمران خان کی حکومت کی جانب سے مذکورہ فیصلے کو

غریب خواتین کو خودمختیار بنانے کے عمل حملہ قرار دیدیا۔ انکا کہنا تھا کہ موجودہ حکمران حکومتی وسائل فقط پیسے والے طبقے میں بانٹ رہے ہیں۔ لگتا ہے حکومت چاہتی ہے کہ ملک میں غربت اور بے روزگاری موجود رہے۔ پی ٹی آئی حکومت ایک کروڑ نوکریاں دینے اور 50 لاکھ گھر بنانے والے اپنے الیکشن منشور سے پہلے ہی یوٹرن لے چکی۔ بلاول بھٹو زرداری نے کہا انکروچمینٹ کے نام پر بڑے پئمانے پر بے گھر اور بے روزگار ہونے والوں کے معاملے سے بھی حکومت آنکھیں چْرا رہی ہے۔ غریبوں پر جاری معاشی حملوں کی ذمہ دار وفاقی کابینہ ہے۔ لوگوں کے بے گھر ہونے، لاکھوں لوگوں کے بے روزگار اور اپنے بچوں کی خوراک کے لیئے پریشان خواتین کے معاملے پر حکمرانوں کی خاموشی جرم ہے۔ بینظیر انکم سپورٹ ان خواتین کے لیئے لائف لائین ہے، جو اپنے بچوں کی خاطر فاقہ کشی کرنے پر مجبور ہوتی ہیں۔ غریبوں کے گذر سفر اور پاکستان کے واحد سوشل سیفٹی نیٹ پر حملے سے تحریک انصاف کی سفاکی عیاں ہے۔ حکومت کا ہر وہ میمبر جو اس معاملے پر خاموش ہے وہ غریبوں کے معاشی قتلام کے جرم میں برابر کا مجرم ہوگا۔انہوں نے کہا کہ حکومت فوری طور فیصلہ واپس لے، ورنہ پیپلز پارٹی ہر فورم پر اس کی شدید مخالفت کرے گی۔ پیپلز پارٹی موجودہ حکومت کی عوام دشمن اور خواتین دشمن پالیسیوں پر عملدرآمد ہونے نہیں دے گی۔

موضوعات:بینظیر انکم سپورٹ پروگرام چیئرمین بلاول بھٹو ز ر داری