کراچی (این این آئی) اسپیکر سندھ اسمبلی آغا سراج درانی نے کہا ہے کہ چوہدری نثار علی خان وزرات عظمیٰ نہ ملنے کے باعث اس وقت صدمے کی کیفیت میں ہیں ۔وہ جیسے ہی صدمے سے باہر نکلیں گے تو کئی راز افشاں کریں گے ۔ان خیالات کا اظہار انہوں نے جمعہ کو سندھ اسمبلی میں میڈیا سے بات چیت کرتے ہوئے کیا ۔آغا سراج درانی نے کہا کہ ۔نئی وفاقی کابینہ کو سندھ پرہر صورت میں خصوصی توجہ دینا ہوگی ۔

انہوں نے کہا کہ دانیال عزیز آدمی تو اچھے ہیں لیکن مار کھاگئے ہیں ۔انہوں نے پاناما کیس میں نواز شریف کی حد سے زیادہ وکالت کی لیکن گروپ بندی کرکے ان کاراستہ روک دیا گیا ہے ۔اب نواز شریف کو بھی پتہ چل گیا ہوگا کہ ان کا انتخاب کیسا ہوتا ہے ۔آغا سراج درانی نے کہا کہ سابق وفاقی وزیر داخلہ چوہدری نثار علی خان وزیراعظم بننا چاہتے تھے ۔اپنی خواہش پوری نہ ہونے کی وجہ سے وہ اس وقت صدمے کی کیفیت میں ہیں ۔چوہدری نثار علی خان جیسے ہی صدمے سے باہر آئیں گے تو کئی راز افشاں کریں گے ۔

موضوعات:آغا سراج درانی