خرطوم،ابوظہبی(این این آئی)متحدہ عرب امارات کے بعد سوڈان نے بھی اسرائیل سے تعلقات قائم کرنے کا ارادہ ظاہر کر دیا،غیرملکی خبررساں ادارے کے مطابق ترجمان سوڈانی وزارت خارجہ نے بتایاکہ معاہدہ رواں برس یا اگلے برس کے اوائل تک ہوگا۔ترجمان حیدر بداوی الصادق کا میڈیا سے بات کرتے ہوئے کہنا تھا کہ اسرائیل سے امن معاہدہ کرنے کے خواہشمند ہیں۔

تعلقات سوڈان کے مفاد میں قائم کیے جائیں گے۔انھوں نے کہا کہ دونوں ممالک کے حکام کے درمیان رابطے سے انکار نہیں ہے، عداوت جاری رکھنے کی کوئی وجہ نہیں، معاہدے سے اسرائیل اور سوڈان دونوں مستفید ہوں گے۔دریں اثنا اسرائیل کی بیرون ملک کارروائیوں کی ذمے دار خفیہ ایجنسی موساد کے سربراہ یوسی کوہن نے متحدہ عرب امارات کے مشیر برائے قومی سلامتی سے ملاقات کی ہے اور ان سے دونوں ملکوں کے درمیان سکیورٹی کے شعبے میں تعاون پر تبادلہ خیال کیا ہے۔یو اے ای کی سرکاری خبررساں ایجنسی نے اطلاع دی کہ یوسی کوہن کے امارات کے دورے کے موقع پر یہ ملاقات ہوئی لیکن اس نے یہ نہیں بتایا کہ دونوں میں یہ ملاقات کہاں ہوئی ۔ طرفین نے سکیورٹی کے شعبے میں تعاون کے امکانات کے حوالے سے تبادلہ خیال کیا اور ایک دوسرے سے علاقائی سطح پر ہونے والی پیش رفتوں اور کووِڈ19کی وبا پر قابو پانے کے لیے دونوں ملکوں کی کاوشوں سمیت مشترکہ مفادات سے متعلق امور کے بارے میں بات چیت کی ۔

موضوعات:سوڈان