کراچی(این این آئی) مقبول ترین ڈرامہ سیریل ’’میرے پاس تم ہو‘‘ کی آخری قسط سنیمائوں میں بھی دکھائی جائیگی۔تفصیلات کے مطابق مقبول ترین ڈرامہ ’میرے پاس تم ہو‘ ان دنوں شہرت کی بلندیوں پر ہے۔ ہمایوں سعید اور عائزہ خان نے اپنی اداکاری کے ذریعے ایسا سحر طاری کیا کہ پاکستان سمیت دنیا بھر میں موجود اپنے مداحوں کو ڈرامہ دیکھنے پر مجبور کردیا ہے۔بہترین کہانی اور اداکارہ کی وجہ سے اس ڈرامہ کو جو مقبولیت حاصل ہو رہی ہے۔
اس کا کوئی ثانی نہیں لیکن اب یہ ڈرامہ اپنے اختتامی مراحل میں داخل ہونے جا رہا ہے۔ اور اسی بات کے پیش نظر ڈرامے کی آخری قسط پاکستان بھر کے سنیمائوں میں دیکھانے کا فیصلہ کیا گیا ۔نجی ٹی وی کی جانب سے ٹوئٹ میں تصدیق کرتے ہوئے کہا گیا کہ پاکستان کی تاریخ کے مقبول ترین ڈرامے کا اختتام ہونے جا رہا ہے لیکن یہ ڈرامہ اپنے مقرر وقت پر ہفتے کی شب چینل پر نشر ہونے کے ساتھ ساتھ پاکستان بھر کے سنیمائوں میں بھی دکھایا جائے گا۔
