اسلام آباد (نیوز ڈیسک) قومی کرکٹ ٹیم کے وکٹ کیپر بیٹر محمد رضوان کو پاکستان کرکٹ بورڈ (پی سی بی) نے میڈیا سے بات چیت کرنے سے بھی روک دیا ہے۔

میڈیا رپورٹس کے مطابق ذرائع کا کہنا ہے کہ پی سی بی نے محمد رضوان کو ہدایت کی ہے کہ وہ اس معاملے پر میڈیا سے گفتگو نہ کریں، کیونکہ ان سے متعلق معاملہ نیشنل سائبر کرائم انویسٹی گیشن ایجنسی (این سی سی آئی اے) میں زیرِ تفتیش ہے۔

ذرائع کے مطابق محمد رضوان آئی سی سی کو بھیجے گئے خط کے حوالے سے اپنا مؤقف اور اس کی تفصیلات میڈیا کے سامنے رکھنا چاہتے تھے۔ وہ سینٹرل کنٹریکٹ کی شق 4.1 کی پابندی کرتے ہوئے شق 16 کے تحت اپنا حق استعمال کرنے کے خواہاں تھے۔

پی سی بی کے سینٹرل کنٹریکٹ کی شق 4.1 کے تحت کھلاڑی متعلقہ اجازت کے بغیر عوامی بیان جاری نہیں کرسکتا، جبکہ شق 16 میں بورڈ اور کھلاڑی کے درمیان باہمی تعاون کی شرط شامل ہے۔

واضح رہے کہ انگلینڈ کے دورے کے دوران دو ٹیسٹ میچز میں شکست کے بعد جن پاکستانی کھلاڑیوں کو واپس بلایا گیا تھا، محمد رضوان بھی ان میں شامل تھے۔

بعد ازاں پی سی بی نے محمد رضوان اور امام الحق کے موبائل فون بھی اپنی تحویل میں لے لیے تھے، جنہیں بعد میں این سی سی آئی اے کے حوالے کردیا گیا۔ دونوں کرکٹرز کو ڈومیسٹک کرکٹ میں شرکت سے بھی روک دیا گیا تھا۔