اسلام آباد (نیوز ڈیسک) معروف اسپورٹس اینکر اور صحافی ڈاکٹر نعمان نیاز نے سابق فاسٹ بولر شعیب اختر کے حالیہ ریمارکس پر شدید ردِعمل دیتے ہوئے انہیں قانونی نوٹس بھجوا دیا ہے۔ یہ ریمارکس 25 مئی 2025 کو کرکٹ شو “دی ڈگ آؤٹ” کی 31ویں قسط کے دوران دیے گئے، جو تماشا پلیٹ فارم پر نشر ہوا۔

شو میں گفتگو کرتے ہوئے شعیب اختر نے پاکستان کرکٹ ٹیم کی کوچنگ اور انتظامی نظام پر تنقید کرتے ہوئے کہا، “ہمارے وقت پر تو ہمیں معلوم ہی نہیں ہوتا تھا کہ کوچ کون ہے یا ٹیم کا منیجر کون ہے۔” اس کے بعد انہوں نے مبینہ طنزیہ انداز میں مزید کہا، “منیجر تو اس لیے ہوتا تھا کہ ہمارے بیگ اٹھا کر کمرے تک پہنچائے، یہ ڈاکٹر نعمان تو بس بیگ اٹھاتا تھا اور کمپیوٹر پر کچھ لکھتا رہتا تھا۔”

ڈاکٹر نعمان نے ان بیانات کو اپنی ساکھ اور پیشہ ورانہ عزت کے خلاف قرار دیتے ہوئے سخت موقف اپنایا ہے۔ ان کے وکیل، قاضی عمیر علی کی جانب سے 29 مئی کو شعیب اختر کو قانونی نوٹس ارسال کیا گیا، جس میں کہا گیا ہے کہ ان ریمارکس سے ڈاکٹر نعمان کی شہرت کو ناقابل تلافی نقصان پہنچا ہے۔

نوٹس میں واضح کیا گیا ہے کہ اگر شعیب اختر نے فوری طور پر اپنے بیان پر عوامی معذرت یا وضاحت پیش نہ کی، تو ہتک عزت آرڈیننس 2002 کے تحت قانونی چارہ جوئی کی جائے گی۔

یاد رہے کہ یہ پہلا موقع نہیں ہے کہ ان دونوں شخصیات کے درمیان تنازع سامنے آیا ہو۔ اس سے قبل 2021 میں بھی ایک لائیو اسپورٹس شو کے دوران تلخ کلامی کے بعد شعیب اختر پروگرام چھوڑ کر چلے گئے تھے، جس کے بعد ان کے تعلقات میں کشیدگی برقرار رہی۔