احمد آباد(این این آئی) ٹیم منیجمنٹ نے حکمت عملی کے طور پر ورلڈ کپ کے وارم اپ میچ میں پاکستانی فاسٹ بولر شاہین آفریدی اور اسپنر شاداب خان سے بولنگ نہیں کروائی۔پاکستان ٹیم کے ذرائع نے اس حوالے سے بتایا کہ ٹیم منیجمنٹ نے حکمت عملی کے طور پر دونوں کھلاڑیوں سے بولنگ نہیں کروائی۔ٹیم ذرائع کے مطابق منیجمنٹ دیگر بولرز کو زیادہ میچ پریکٹس دینے کی خواہشمند تھی، دو وارم اپ میچز میں اسکواڈ کے تمام 15 ممبران کو مختلف طور پر آزمایا جائے گا۔

پاکستان ٹیم کے ذرائع کے مطابق ورلڈ کپ کے باقاعدہ میچز سے قبل 2 وارم آپ میچز میں کنڈیشنز سے ایڈجسٹ ہونے کا پلان ہے۔یاد رہے کہ گزشتہ روز کرکٹ ورلڈ کپ 2023ء کے وارم اپ میچ میں نیوزی لینڈ نے پاکستان کو 5 وکٹ سے شکست دی تھی، کیویز نے 346 رنز کا بڑا ہدف 44 ویں اوور میں ہی حاصل کر لیا تھا۔