لاہور( این این آئی)قومی ٹیم کے سابق کپتان سرفراز احمد کے بیٹے عبداللہ نے گزشتہ روز ون ڈے کرکٹ سے ریٹائرمنٹ لینے کا اعلان کرنے والے بین اسٹوکس کے نام پیغام جاری کیا ہے۔سماجی رابطے کی سائٹ ٹوئٹر پر سرفراز احمد کی اہلیہ خوش بخت کے اکائونٹ سے پیغام جاری کیا گیا ہے۔سرفراز احمد کے بیٹے عبداللہ کا کہنا ہے کہ بین اسٹوکس ہم آپ کی کمی ہمیشہ محسوس کریں گے۔ واضح رہے کہ انگلش ٹیسٹ ٹیم کے کپتان بین اسٹوکس نے ون ڈے انٹرنیشنل کرکٹ سے ریٹائرمنٹ کا اعلان کردیا ہے۔بین اسٹوکس ریٹائرمنٹ کے اعلان کے بعد جنوبی افریقا کے خلاف ڈرہم میں اپنے ون ڈے کیریئر کا آخری میچ کھیلا۔انہوں نے کہا کہ ون ڈے کرکٹ سے ریٹائرمنٹ کا فیصلہ مشکل تھا، میں اس فارمیٹ میں 100 فیصد پرفارم نہیں کر پارہا تھا۔