اسلام آباد (نیوز ڈیسک) کیا پاکستان ایشیا کپ کی میزبانی کرے گا؟ ایشین کرکٹ کونسل کا اجلاس 3 مارچ کو دبئی میں ہوگا۔ ایشین کرکٹ کونسل کے اجلاس میں چیئرمین پی سی بی احسان مانی شرکت کریں گے،پاک بھارت کشیدگی کے باعث ایشیا کپ پاکستان میں نہ ہونے کا امکان ہے،2018 میں ایشیا کپ بھارت کی میزبانی میں دبئی میں ہوا تھا۔دوسری جانب بورڈ آف کنٹرول فار کرکٹ ان انڈیا کے صدر سارو گنگولی نے ایشین کرکٹ کونسل کے سربراہ اجلاس سے قبل ہی پاکستان کی میزبانی میں ہونے والے
ایشیا کپ کی مخالفت کردی۔ایڈن گارڈن کولکتہ میں گفتگو میں ساروو گنگولی نے کہا کہ ایشیا کپ 2020 پاکستان میں نہیں ہوگا بلکہ متحدہ عرب امارات کا شہر دبئی ٹورنامنٹ کی میزبان کرے گا۔انہوں نے کہا کہ پاکستان اور بھارت کے ایشیا کپ ٹورنامنٹ میں کھیلنے کی راہ ہموار اسی وقت ہوگی جب میزبانی دبئی کرے گا۔خیال رہے کہ رواں سال ستمبر میں ایشیا کپ شیڈول ہے جس کی میزبانی پاکستان نے کرنی ہے تاہم بھارتی کرکٹ بورڈ کی جانب سے مسلسل پاکستان میں نہ کھیلنے کے بہانے بنائے جارہے ہیں۔
