راولپنڈی (این این آئی) بنگلہ دیش کی ٹیسٹ کرکٹ ٹیم پانچ فروری اسلام آباد پہنچے گی پاکستان اور بنگلہ دیش کے درمیان پہلا ٹیسٹ سات فروری سے شروع ہوگا جوگیارہ فروری تک جاری رہے گا ۔تفصیلات کے مطابق پاکستان کرکٹ بورڈ نے زیادہ سے زیادہ شائقین کو اسٹیڈیم لانے کیلئے 4 جنرل اسٹینڈز مختص کرنے کر نے کا منصوبہ تیار کرلیا ذرائع کے مطابق شائقین کا داخلہ مفت ہوگا
اور مفت داخلے کی اجازت صرف شناختی کارڈ کے حامل افراد کو ہوگی۔ یاد رہے کہ پی سی بی نے اظہرعلی کی قیادت میں 16رکنی ٹیم کا اعلان کردیا ہے، مہمان ٹیم 5 فروری کو پاکستان پہنچے گی۔یاد رہے کہ بنگلہ دیش کی ٹیم نے گزشتہ ماہ پاکستان کا دورہ کیا تھا اور تین ٹی ٹوئنٹی میچوں کی سیریز کھیلی تھی جس میں پاکستان نے 0-2 سے برتری حاصل کی تھی، جبکہ تیسرا میچ بارش کی نذر ہوگیا تھا۔شیڈول کے مطابق بنگلہ دیش کی ٹیم سیریز کے دوسرے مرحلے میں اپریل میں پاکستان کا دورہ کریگی جس میں ایک ٹیسٹ اور ایک ون ڈے میچ کھیلا جائیگا۔پاکستان سپر لیگ کے اختتام پر بنگلہ دیش کی ٹیم اپریل میں دوبارہ پاکستان کا دورہ کریگی جہاں سیریز کا واحد ون ڈے میچ 3 اپریل کو کراچی میں کھیلا جائے گا اس کے بعد 5 سے 9 اپریل تک سیریز کے دوسرے ٹیسٹ میچ کے لیے دونوں ٹیمیں کراچی کے نیشنل اسٹیڈیم میں نبرد آزما ہوں گی۔خیال رہے کہ بنگلہ دیش کی حکومت کی جانب سے ٹیم کو پاکستان بھیجنے کے حوالے سے سے تحفظات کا اظہار کیا تھا تاہم چیئرمین پی سی بی اور دیگر حکام کی جانب سے بی سی بی سے مذاکرات کرکے انہیں راضی کرلیا تھا اور پاکستان سپر لیگ کے باعث سیریز کو دو مرحلوں میں تقسیم کیا گیا تھا۔
