مانچسٹر( آن لائن )ورلڈ کپ کا سب سے بڑا میچ پاک بھارت ٹاکرا بھی اگر بارش کی نذر ہو گیا تو اس سے مختلف غیر ملکی نشریاتی اداروں اور سپانسرز کو بھاری مالی نقصان سہنا پڑے گا۔ورلڈ کپ کے 4 میچز بارش کی نذر ہونے کے بعد پاک بھارت میچ کے بھی بارش سے متاثر ہونے کے امکانات ظاہر کیے جارہے ہیں۔

شائقین کرکٹ کے ساتھ ساتھ میچ سے جڑے دیگر لوگ بھی میچ کے ممکن ہوجانے کے لیے پر امید ہیں کیوں کہ اس سے قبل بارش کی نذر ہونیوالے میچز میں نیوزی لینڈ بمقابلہ بھارت، سری لنکا بمقابلہ بنگلہ دیش، سری لنکا بمقابلہ پاکستان اور ویسٹ انڈیز بمقابلہ جنوبی افریقا شامل ہیں۔کاروباری نقطہ نظر سے دیکھیں تو پاک بھارت میچ کی منسوخی کے بعد بڑے بڑے غیر ملکی سپانسرز کے پیسے ڈوبنے کے خدشات پیدا ہوسکتے ہیں۔روایتی حریفوں کا یہ مقابلہ دنیا بھر میں ایونٹ کا سب سے زیادہ دیکھا جانیوالا میچ تصور کیا جا رہا ہے جس میں 40 بڑی اشتہاری کمپنیوں کا بھاری مال لگا ہوا ہے، ان کمپنیوں کیلئے زیادہ سے زیادہ فائدہ حاصل کرنے کا یہ نادرموقع ہے۔ورلڈ کپ میچز نشر کرنیوالے سرکاری نشریاتی ادارے سٹار سپورٹس کومانچسٹر کے اولڈ ٹریفورڈ میں ہونیوالے پاک بھارت ٹاکرے سے بے پناہ مالی فوائد ملنے کی توقع ہے ۔واضح رہے کہ برطانوی محکمہ موسمیات نےآج مانچسٹر میں بارش کی پیش گوئی کی ہے، اگر اس میچ پر بارش کا پانی پھر گیا تو سارے کاروبار پر بھی پانی پھر جائے گا۔دوسری جانب بارہویں آئی سی سی ون ڈے ورلڈ کپ کرکٹ ٹورنامنٹ کا سب سے بڑا ٹاکرا آج اتوار کو پاکستان اور روایتی حریف بھارت کی ٹیموں کے درمیان ہو گا، میچ پاکستانی وقت کے مطابق 2:30 بجے شروع ہو گا، گرین شرٹس ورلڈ کپ ٹورنامنٹس میں بھارت کے خلاف ناکامیوں کی روایت بدلنے کیلئے پر جوش ہیں۔بھارتی ٹیم تین میچز کے بعد 5 پوائنٹس کے ساتھ پوائنٹس ٹیبل پر چوتھے جبکہ پاکستانی ٹیم چار میچز کے بعد 3 پوائنٹس کے ساتھ پوائنٹس ٹیبل پر آٹھویں نمبر پر موجود ہے۔