دبئی(این این آئی)قومی ویمنز ٹیم کی کپتان بسمہ معروف کے زخمی ہونے کی وجہ سے آئی سی سی ویمنز چمپئن شپ سیریز کے پہلے میچ میں ٹیم کی قیادت جویریہ خان کے سپرد کر دی گئی۔دبئی انٹرنیشنل کرکٹ اسٹیڈیم میں ٹریننگ کے دوران بسمہ معروف کیچ پکڑتے ہوئے ساتھی فیلڈر کے ساتھ ٹکرائیں اور گیند ان کے جبڑے پر لگی۔ بسمہ کو اسٹریچر پر میدان سے باہر لے جانے کے بعد ہسپتال پہنچادیا گیا تھا۔پی سی بی نے بتایا کہ بسمہ معروف کا

اسکین کلیئر آیا، تشویش کی کوئی بات سامنے نہیں آئی تاہم ان کی پہلے ون ڈے میں شمولیت کا فیصلہ میچ سے قبل کیا جائیگا۔ جمعرات کو بسمہ معروف کو آرام دینے کا فیصلہ کرتے ہوئے قیادت جویریہ خان کے سپرد کر دی گئی۔واضح رہے کہ بسمہ معروف سائینس کے کامیاب آپریشن کے بعد ویمنز ورلڈ ٹی ٹوئنٹی میں قومی ٹیم میں واپس آئی تھیں لیکن قیادت جویریہ خان نے کی۔ ویسٹ انڈیز کے خلاف کراچی میں کھیلی جانے والی ٹی ٹوئنٹی سیریز میں بسمہ معروف نے دوبارہ کمان سنبھال لی۔

موضوعات:بسمہ معروف