ماسکو(مانیٹرنگ ڈیسک)روس میں فٹبال ورلڈ کپ جاری ہے ۔اس عالمی مقابلے میں شرکت کرنے اور اس سے لطف اندوز ہونے کیلئے پوری دنیا کے کھلاڑی اور شائقین روس میں جمع ہیں۔ بدقسمتی سے پاکستان کی فٹبال ٹیم تو ورلڈ کپ کا حصہ نہیں ہے لیکن اس کا یہ مطلب نہیں ہے کہ اس عالمی میلے میں ہماری کوئی نمائندگی بھی نہیں ہے۔ سچ تو یہ ہے کہ کچھ پاکستانی نوجوانوں نے روس پہنچ کر پاکستان کا نام ایسا بلند کیا ہے کہ جان کر آپ کو بھی ان پر فخر ہو گا۔

فاران تنویر اور ان کے ساتھی نوجوان ان لوگوں میں شامل ہیں جو روس میں پاکستان کی نمائندگی کر رہے ہیں اور ورلڈ کپ میں پاکستان کے کردار کو فخریہ طور پر دنیا کے سامنے پیش کررہے ہیں۔ وہ ایک بڑے پاکستانی پرچم کے ساتھ روس میں موجود ہیں جس پر تحریر ہے ” ورلڈ کپ کیلئے فٹبال ہم نے بنائے ہیں۔“ انہوں نے یہ جہازی سائز پرچم شہر بھر میں لہرایا ہے اور دنیا بھر سے آئے لوگوں نے اسے بھرپور توجہ دی ہے۔تنویر نے بتایا کہ وہ اور ان کے دوست اس پاکستانی پرچم کو شہر بھر میں لہرارہے ہیں اور دنیا بھر سے آئے فٹبال کے پرستار اس بات کو قابل تحسین قرار دے رہے ہیں کہ ورلڈ کپ کیلئے فٹبال پاکستان نے تیار کئے ہیں۔ وہ جہاں بھی جاتے ہیں پاکستان زندہ باز کے پرجوش نعرے سنائی دیتے ہیں۔ دلچسپ بات یہ ہے کہ ان کے جوش و جذبے کو دیکھتے ہوئے غیر ملکی شہری بھی ان کے ساتھ مل کر پاکستان زندہ باد کے نعرے لگاتے ہیں۔واضح رہے دفاعی چیمپئن  جرمنی پہلے ہی رائونڈ میں ایونٹ سے باہر ہو گئی ہے ۔

موضوعات:فٹبال ورلڈ کپ