لاہور (آئی این پی )صوبائی دارالحکومت لاہور میں پی ایس ایل کے ممکنہ فائنل میچ کی سیکیورٹی کیلئے غیر معمولی انتظامات کی تیاری شروع کر دی گئی ‘ پاک فوج ‘ رینجرز اور پنجاب حکومت کے درمیان اس اہم ایونٹ کی سیکیورٹی کے سلسلے میں 2 مشاورتی اجلاس منعقد ہوئے ہیں۔ ذرائع کے مطابق گزشتہ روز بھی پاک فوج ‘ رینجرز اور صوبائی اداروں کے اعلیٰ حکام کے درمیان پی ایس ایل کے فائنل میچ کی سیکیورٹی کے سلسلے میں رابطے ہوئے ہیں۔ سیکیورٹی پلان پر تبادلہ خیال کیا گیا۔ ذرائع نے بتایا ہے کہ غیر معمولی انتظامات کو حتمی شکل دیدی گئی ہے
اور تینوں اداروں نے تیاریوں کی نگرانی کیلئے قریبی رابطے برقرار رکھنے کا فیصلہ کیا ہے۔ مجوزہ سیکیورٹی پلان کے تحت آنے والے شائقین کی گاڑیاں قذافی سٹیڈیم سے ایک کلو میٹر دور پارک کی جائیں گی اور وہ پیدل اسٹیڈیم میں داخل ہو سکیں گے۔ جگہ جگہ مرکزی و صوبائی سیکیورٹی اداروں کے جوان تعینات ہوں گے اور بڑی تعداد میں واک تھرو گیٹ نصب کئے جائیں گے جبکہ سی سی ٹی وی کیمروں کے علاوہ فضائی نگرانی بھی کی جائے گی اور پی سی ایل کی اس غیر معمولی سیکیورٹی انتظامات سے باقاعدگی سے اعلیٰ عسکری و سیاسی قیادت کو آگاہ کیا جائیگا۔
