ممبئی(نیوزڈیسک)بھارتی ریاست مہاراشٹر کے دارالحکومت ممبئی میں ایک سکول کے طالبعلم نے کرکٹ میچ میں ایک ہزار رنز کی اننگز کھیل کر نیا عالمی ریکارڈ قائم کر دیا ہے۔کے سی گاندھی سکول سے تعلق رکھنے والے رنوو دھنیواد نے یہ ریکارڈ ایچ ٹی بھنڈاری کپ انٹر سکول ٹورنامنٹ کے دوران آریا گوروکل سکول کے خلاف کھیلتے ہوئے بنایا ہے۔پرنوو نے اپنی دو روزہ اننگز کے دوران پیر کو آرتھر کولنز کا 1899 میں بنایا گیا 628 رنز کا ریکارڈ توڑا تھا۔منگل کو بھی ان کی اننگز جاری رہی اور وہ ایک ہزار رن بنانے میں کامیاب ہوگئے۔اس ریکارڈ ساز اننگز کی بدولت ان کی ٹیم نے 1465 رنز پر اننگز ڈیکلیئر کر دی۔ پرنوو نے یہ سکور صرف 323 گیندوں پر بنایا اور ان کی اننگز 59 چھکوں اور 127 چوکوں سے مزین تھی۔اس اننگز کے بعد بھارتی اخبار ہندوستان ٹائمز سے بات کرتے ہوئے پرنوو کا کہنا تھا کہ ’جب میں نے کھیلنا شروع کیا تو ریکارڈ توڑنے کی بات میرے ذہن میں نہیں تھی۔ میں تو بس اپنے انداز سے کھیلتا رہا جو کہ آغاز سے ہی جارحانہ انداز اپنانا ہے۔‘خیال رہے کہ ممبئی میں سکول کرکٹ نے ملک کو سچن تندولکر، ونود کامبلی اور روہت شرما جیسے کھلاڑی دیے ہیں۔پرنوو دھنیواد کی اس اننگز پر بھارت میں سوشل میڈیا پر بھی بہت دلچسپی دکھائی جا رہی ہے اور اس وقت بھارت میں ٹوئٹر پر یہ ٹاپ ٹرینڈ ہے۔