کراچی(نیوز ڈیسک ) چیئرمین بورڈکو ٹیم کی ناکامیوں نے تشویش کا شکار کر دیا، ان کا کہنا ہے کہ مینجمنٹ اور کپتان سے ملاقات کے بعد مستقبل کا فیصلہ کریں گے، دوسری جانب کوچ وقار یونس کی شہریار خان سے اہم ملاقات بدھ کو ہوگی۔تفصیلات کے مطابق پاکستان کو انگلینڈ نے ٹوئنٹی20 سیریز میں 3-0 سے شکست دی، اس دوران بیٹنگ، بولنگ اور فیلڈنگ تینوں شعبوں میں مسائل نظر آئے، اس سے قبل ون ڈے سیریز میں بھی گرین شرٹس کو ناکامی کا سامنا کرنا پڑا تھا،گذشتہ روز اس حوالے سے جب نمائندہ ”ایکسپریس“ نے چیئرمین پی سی بی شہریارخان سے رابطہ کیا تو انھوں نے کہا کہ ٹیم کی کارکردگی سب کے سامنے ہے میں کیا کہوں، مسلسل شکستیں شائقین کے ساتھ ہمارے لیے بھی تشویش کا باعث ہیں۔اس سوال پر کہ بہتری کیلیے کیا اقدامات کرینگے چیئرمین نے کہا کہ واپسی کے بعد مینجمنٹ اور کپتان سے دورے کی رپورٹ لوں گا، ناکامیوں کے اسباب جاننے کے بعد ہی مستقبل کی حکمت عملی تشکیل دی جا سکے گی، کوچ وقار یونس اور کپتان شاہد آفریدی کے مستقبل پر شہریارخان نے کہا کہ سب کی بات سن کر فیصلہ کریں گے کہ کوئی تبدیلی کرنا ہے یا نہیں۔ بعض حلقوں کی جانب سے ٹیسٹ اور مختصر طرز کیلیے الگ کوچز کی تجویز بھی سامنے آئی ہے۔مگر چیئرمین نے اس حوالے سے تبادلہ خیال سے گریز کیا۔ سیریز میں شکست کے بعد وقار یونس اپنے نئے ملک آسٹریلیا جانے کے بجائے پاکستان آئے ہیں، ان کی بدھ کو قذافی اسٹیڈیم لاہور میں شہریارخان سے اہم ملاقات متوقع ہے، ذرائع کے مطابق وہ سلیکشن کے حوالے سے تحفظات ظاہر کرنے کے ساتھ بعض سینئرز سے پیچھا چھڑانے کی تجویز بھی دیں گے،کپتان شاہد آفریدی بنگلہ دیش لیگ کے میچز کھیلنے کے بعد لاہور واپس آئیں گے۔