لاہور(نیوزڈیسک)پاکستان کے سابق آل راﺅنڈر اظہر محمود نے کہا ہے کہ قومی ٹیم کے بالنگ کے شعبے کو مضبوط بنانے کے لیے فاسٹ بالر جنید خان کو ایک روزہ ٹیم کا مستقل رکن بنانا ہوگا ،حالیہ دورہ کے دوران زمبابوے ٹیم کی طرف سے پاکستان کے خلاف بڑے مجموعے جوڑنا تشویش کا باعث ہے جو قومی ٹیم کی سلیکشن میں غیر مستقل مزاجی کو ظاہر کرتا ہے ۔ایک انٹر ویو میں انہوں نے جنید خان کو مستقل بنیادوں پر کھلانے پر زور دیتے ہوئے کہا کہ فاسٹ بالر کو ایک روزہ ٹیم کا حصہ ہونا چاہیے تھا لیکن انہیں ابتدائی دونوں میچوں میں نظر انداز کیا گیا۔انہوں نے کہا کہ بائیں ہاتھ کے بالرز یارکرز بہت اچھی کر سکتے ہیں اور جنید خان ،وہاب ریاض کے ساتھ ٹیم کے بہترین بالرز میں سے ایک ہیں۔سابق آل راﺅنڈر نے قومی ایک روزہ ٹیم کے کپتان اظہر علی کی تعریف کرتے ہوئے کہا کہ جس طرح انہوں نے خود کو ایک ٹیسٹ بلے باز سے ون ڈے کھلاڑی میں تبدیل کیا ہے وہ بھی قابل ستائش ہے۔انہوں نے پاکستان کرکٹ بورڈ پر زور دیا کہ وہ اظہر علی وہ بطور کپتان وقت دے تاکہ وہ خود کو ایک کامیاب قائد ثابت کر سکیں